Nýggjur kupil verður reistur á Sornfelli
Roknað verður við, at arbeiðið fer at taka einar seks vikur.
Arbeitt verður í løtuni við at reisa uppaftur kupilin á Sornfelli, sum brotnaði í ódnarveðrinum á jólum 2016.
Bogi Vinther hjá Landsverki sigur við R7, at arbeiðið byrjaði í fjør, men neyðugt varð at gevast orsaka av veðri, og eisini vóru trupulleikar av, at alt passaði ikki saman, sum tað skuldi.
Nýggi kupilin verður øðrvísi enn tann gamli. Hann er gjørdur av glasfipuri, meðan gamli kupilin var ein dúkur, sum varð plástur upp. Sostatt er nýggi kupilin sterkari enn tann gamli var.
Radarin sum var í kuplinum fekk eisini skaða í ódnarveðrinum, tá kupilin brotnaði, og hóast ein radari hevur verið tøkur seinasta árið, so hevur hann ikki verið brúktur.
“Radarin kann ikki verða brúktur, tá eingin kupil er, tí vandi er fyri, at klaki kann detta av mastrini, sum stendur við síðuna av, og tað kann skaða radaran,” sigur Bogi Vinther.
“Flogførini klára seg uttan radaran, men við radaranum kunnu tey flúgva tættari og tað sparir brennievni,” sigur hann.
Bogi Vinther roknar ikki við at nýggi kupilin fer at standa leingi á Sornfelli.
“Nú verður farið yvir til at nýta mastrar ístaðin, so tað er bara ein spurningur um tíð, til radarar ikki verða nýttir longur,” sigur hann.
Spurdur hvat hin kupilin á Sornfelli verður nýttur til, sigur hann, at hann verður ikki nýttur longur.
Tað er landið sum eigur støðina á Sornfelli, meðan danska Naviair stendur fyri kuplunum.
Roknað verður við, at arbeiðið við at reisa nýggja kupilin fer at taka umleið 6 vikur.
Mest lisið í farnu viku
Havstovan tilmælur at stongja tað mesta
Samband
Heygsvegur 8
490 Strendur