Hamas: 50 av teimum sum mánadagin lótu lív í Gaza, vóru okkara limir
Meira enn 60 palistinar vórðu dripnir mánadagin og 2.200 vórðu løstað av skotríðum ella táragassi.
50 av palestinunum, sum fyrr í hesi vikuni vórðu dripnir undir einum mótmæli á markinum millum Gazageiran og Ísrael vóru limir í Hamas. Tað sigur Salah Bardaweil, limur í Politburonum hjá Hamas, sambært Jerusalem Post.
Síðani 30. mars hava nógvir palestinar luttikið í stórum mótmælistiltøkum á markinum millum Gaza og Ísrael, fyri at stuðla palestinskum flóttafólkum í at sleppa heim aftur til teirra gamla bústað í Ísrael. Eisini vilja tey leggja trýst á jødiska statin, fyri at fáa avmarkað forðingarnar í at flyta fólk og vørur til og úr Gasageiranum.
Og soleiðis var eisini mánadagin, sum var 70 ára stovningardagurin hjá statinum Ísrael.
Ísraelski herðurin lýsti mótmælini mánadagin sum “ ein harðrendan uppreistur”, har luttakararnir royndu at koma sær inn um ísraelska markið, steinaðu og nýttu Molotov-Cocktails móti trygdarvørðum og løgdu eina bumbu nær markagirðingini.
Hóast hetta ákærdu bæði altjóða- og lokalir bólkar Ísrael fyri at nýta alt ov ógvusliga styrki móti tí tey kallaðu “óvápnaðum mótmælisfólkum”.
Í minsta lagi 61 palestinar lótu lív
Ófriðurin mánadagin kostaði í minsta lagi 61 palestinum lívið, sambært Ashraf al-Qidra, sum er talsmaður fyri Heilsumálaráðið hjá Hamas.
“Talið eg sigi tær er alment. Fimti pínslaváttar úr Hamas liðu blóðvitnisdeyða í hesum seinasta bardaganum,” segði hann við eina sjónvarpsstøð í Gaza.
Bardaweil segði ikki hvønn leiklud tey deyðu høvdu í Hamas, ella um nakar av teimum hoyrdi til hernaðarliga veingin hjá felagsskapinum.
Týsdagin søgdu ísraelski herðurin og fregnartænastan Shin Bet, at tey høvdu eyðmerkt 24 av teimum deyðu palistinunum sum yvirgangsmenn, harav teir flestu hoyrdu til Hamas. Hinir hoyrdu til Islamic Jihad.
Færri luttóku í mótmælunum týsdagin
Meðan fleiri túsund palestinar vóru við markið millum Ísrael og Gaza mánadagin, so var talið av mótmælisfólkum munandi minni týsdagin, sum annars eisini var lýstur sum ein avgerandi dagur í søguni hjá palestinum.
Ísraelski uttanríkisráðharrin, Israel Katz, segði við ísraelskt útvarp, at Hamas gjørdi av at linka mótmælini týsdagin, eftir at Egyptaland hevði ávarað um, at um mótmælini fóru at halda fram, fór Ísrael møguliga at svara harðliga aftur.
Kelda: The Jerusalem Post
Mest lisið í farnu viku
Samband
Heygsvegur 8
490 Strendur