Løgmaður: Føroyingar og danir eiga avgerðina um limaskap í Norðurlandaráðnum
Løgmaður hevur í dag verið á fundi við norðurlendsku forsætisráðharrarnar.
“Mín greiða fatan eftir fundin er, at finna Føroyar og Danmark eina skilagóða loysn, so vil Norðurlendska Ráðharraráðið ikki seta seg ímóti tí.” Tað sigur Aksel V. Johannesen, løgmaður, sum á summarfundi saman við norðurlendsku forsætisráðharrunum í Svøríki í dag, enn einaferð gjørdi vart við, at Føroyar vilja gerast sjálvstøðugur limur í Norðurlandaráðnum.
Eitt uppskot um sjálvstøðugan føroyskan limaskap var á skránni til seinasta ársfund í Norðurlandaráðnum, sum var í november í fjør, men tá samtykt Norðurlandaráðið at útseta avgerðina til ársfundin í ár.
Men hetta var ikki einasta málið, sum varð viðgjørt á fundinum millum norðurlendsku stjórnarleiðararnar í dag. Fyrrapartin umrøddu stjórnarleiðararnir millum annað talgilding, grøna orku og verðurlagsøkið. Eisini markaforðingar millum norðanlond vóru á skránni.
”Vit hava leingi havt avbjóðingar við at brúka føroysk koyrikort í Svøríki og Finnlandi. Hesa markaforðing vilja vit beina av vegnum,” sigur løgmaður í einum tíðindaskrivi.
Afturmeldingarnar frá bæði svenska og finska forsætisráðharrunum um tað málið vóru so mikið góðar, at løgmaður roknar við, at málið nú verður loyst.
Mest lisið í farnu viku
Havstovan tilmælur at stongja tað mesta
Samband
Heygsvegur 8
490 Strendur