Stjóralønir í almennum partafeløgum mugu endurskoðast beinanvegin!
Er tað rímiligt, at ávísir stjórar í almennum partafeløgum forvinna langt yvir 100.000 krónur um mánaðin? Tað heldur javnaðartingmaðurin Heðin Mortensen ikki, og tí hevur hann sett Kristinu Háfoss, landsstýriskvinnu við fíggjarmálum, ein fyrispurning um stjóralønirnar í tí almenna í Føroyum.
Ásetingin av stjóralønum í almennum stovnum og almennum partafeløgum kann í summum førum tykjast tilvildarlig. Vit hava dømi um ein stjóra í einum almennum stovni, sum hevur umleið 800 starvsfólk undir sær og fær eina løn á kr. 65.109 um mánaðin, meðan ein annar, sum hevur 22 starvsfólk undir sær, fær kr. 60.860 um mánaðin. Hvussu ber tað til, at aðalstjórin í Uttanríkis- og vinnumálaráðnum fær hægri løn enn løgmansstjórin? Og vit hava dømi um stjórar í almennum partafeløgum, sum forvinna yvir 100.000 krónur um mánaðin - altso nógv meira enn løgmaður. Er hetta rímiligt? Spyr Heðin Mortensen, tingmaður fyri Javnaðarflokkin, Kristinu Háfoss, landsstýriskvinnu við fíggjarmálum.
Í viðmerkingunum til fyrispurningin sigur Heðin Mortensen eisini, at landsstýrismaðurin við samferðslumálum uttan trupulleikar kundi seta lønina hjá stjóranum á Vága Floghavn niður við 30.000 krónum um mánaðin í einum høggi. Heðin Mortensen sigur, at hetta merkir, at tað er góður møguleiki fyri at seta lønirnar niður, og hann metir, at tað er tørvur á at fáa eina yvirskipaða ætlan fyri lønarásetingum í tí almenna í Føroyum beinanvegin.
Mest lisið í farnu viku
Samband
Heygsvegur 8
490 Strendur