Ein hetja í gerandisdegnum: Á bussferð við skúlabussinum hjá Paula Nónklett
Vit vóru við bussinum hjá Paula, tá hann koyrdi skúlabørn frá Rituvík til Skipanes. Ein hendingaríkur túrur
Pauli Nónklett hevur koyrt buss í 21 ár. Hann skuldi bara vera avloysari í 1 ár, men endaði við at halda áfram, og hevur nú koyrt í heili 21 ár. Pauli koyrir skúlabørn, og ein vanligur dagur er frá kl. 07:00-16:00. Um hesa tíðina, beint áðrenn summarfrítíðina, er arbeiðsdagurin munandi styttri tí børnini fáa fyrr frí. Busssurin tekur uml. 70 børn og í dag var bussurin fullur.
Fleiri skúlaflokkar høvdu verið útferð og onkur hevði verið til roynd, so har var nokk av lívið í.
Hendingar á túrinum
Ein skuldi trúð at ein busstúrur ávegis til Skipanes ikki var nakað stórvegis hendingarríkur, men tó, smáar hendingar fylla eisini í einum arbeiðsdegi. Eftir at vera við hendan túrin kann sigast, at tað krevst meira av einum bussførara enn bert at koyra frá a til b. Blíðskapur, tolmóð, gott minnið og eisini námsfrøðiligir eginleikar teljast millum neyðugu dygdirnar hjá einum góðum bussførara.
Vit vóru ikki komin úr Rituvík, tá ein genta kom fram til bussførarin tí hon var farin at bløða aftanfyri oyra. Góð ráð vóru tó ikki dýr. Bussførarin hevði eina køksrullu og so var trupulleikin loystur.
Tveir dreingir royndu skálkabrøgd við at leypa úr bussinum í skeivari bygd, "kom inn aftur",rópti Pauli og fekk dreingirnar inn aftur. Tað tóktist sum kendi hann øll børnini við navni og hvar tey áttu at fara úr bussinum. Tað er nógv hjá einum bussførara at minnast til hvar øll børn skulu av, men hetta sá førarin hjá okkum út til at vita.
Fleiri ferðir ætlaðu onkur børn sær av, á støðum har tey ikki áttu at fara av. Einaferð kom førarin í eina tvístøðu við ein drongi, ið ynskti at fara av aðrastaðni enn hann plagdi. Tað endaði við at hann ringdi til foreldrini fyri at spyrja seg fyri, og tað vísti seg at vera røtt avgerð at taka, tí tá drongurin prátaði við foreldrini sissaðist hann og fór síðani av, har hann var vanur.
Nøkur ráð frá royndum bussførara til teir nýggju.
Týðningarmikið er at seta reglir beinanvegin. At rópa nyttar ikki, tað handlar um at fáa børnini á tína síðu. Tað kemur meir enn so fyri at foreldrini ringja og spyrja, hvar børnini fóru av, og tá er gott at kunna svara teimum.
Tað hevur ofta verið sagt at hesin bussførari er sera dugnaligur og her var sjón fyri søgn.
Mest lisið í farnu viku
Samband
Heygsvegur 8
490 Strendur