Meðalaldurin í Føroyum hækkar
Meðan eldru aldursbólkarnir vaksa, so minkar talið í yngra endanum.
Hagstovan skrivaði í gjár, at tað nú helst búgva 51.000 fólk í Føroyum. Hetta er sum vera man góð tíðindi. Men hyggja vit eftir aldursbýtinum, so eru tíðindini ikki eins góð.
Vit hava gjørt eina samanbering millum fólkatalið í januar 2008 og januar 2018.
Í hesum tíðarskeiðinum vaks samlaða fólkatalið við 2.187 fólkum. Fólkatalið fór úr 48.311 til 50.498 fólk.
Um vit býta fólkatalið í tveir bólkar, sum eru null til 49 ár, og 50 ár og eldri, so sæst, at meðan fólkatalið í eldra endanu er hækkað við 2.996 fólkum, so er fólkatalið í yngra endanum minkað við 809 fólkum.
Um vit býta fólkið í Føroyum í aldursbólkar á 10 ár, so er bara ein aldursbókur yngri enn 50 ár, sum er vaksin árini frá 2008 til 2018. Tað er aldursbólkurin 20 til 29 ár, sum er vaksin við 520 fólkum. Allir hinir aldursbólkarnir í yngra endanum eru minkaðir. Í eldra endanum eru allir aldursbólkarnir vaksnir.
Aldursbólkurin sum vaks mest var 60 til 69 ár. Tann bólkurin vaks við 1.098 fólkum. Næstmest vaks bólkurin 70 til 79 ár, sum vaks við 935 fólkum.
Aldursbólkarnir sum minkaðu mest vóru 10 til 19 ár, 30 til 39 ár og 40 til 49 ár. Hesir aldursbólkar minkaðu allir við umleið 400 fólkum hvør, hóast samlaða fólkatalið í sama tíðarskeiði vaks við 2.187 fólkum.
Mest lisið í farnu viku
Samband
Heygsvegur 8
490 Strendur