10 góð ráð frá Rudda Føroyar
Rudda Føroyar, sum roynir at fáa so nógv fólk við sum gjørligt, at rudda altjóða ruddingardagin 15. september 2018, kemur her við 10 góðum ráðum til, hvussu tú kanst hjálpa tær sjálvum, pengapunginum og umhvørvinum.
1. Hav ein dunk ella fløsku til vatn við, tá tú ert úti – soleiðis sleppur tú undan bæði at brúka óneyðugar pengar og at tarna umhvørvinum.
2. Keyp eina mateskju til matpakkan í staðin fyri at nýta frystiposar og einnýtistilfar. Brúkar tú bara ein frystiposa um dagin, so hevur tú brúkt umleið 1 kilo av plastikki yvir eitt ár.
3. Tak ein termokopp við, tá ið tú keypir kaffi útifrá. Her kann nógv einnýtistilfar sparast, og summastaðni, t.d. í Paname Café, fært tú 10 % avsláttur upp á kaffi, um tú hevur tín egna kopp við.
4. Tak ein stoffposa við, tá ið tú keypir inn – tú sparir 3 krónur, og umhvørvið fegnast! Ein annar møguleiki er at endurnýta teir plastikkposarnar, tú eigur inni. Hav í huga, at stoffposar eisini krevja nógva orku at framleiða, tí skalt tú nýta teir nógv og leingi, so teir ikki eru framleiddir til spillis.
5. Keyp súgvirør úr rustfríum stáli, sum vara alt lívið, um tú nýtir súgvirør heima. Sig nei takk til súgvirør úr plasti, tá ið tú keypir drykkjuvørur úti.
6. Keyp brúkt í staðin fyri at keypa alt nýtt. Í Føroyum finnur tú bæði góð klæðir og innbúgv í ymiskum Facebook-bólkum, endurnýtsluhandlum og hjá Dugna. Klædnaframleiðslan er ein tann mest dálkandi vinnan, sum er til.
7. Legg dent á góðsku heldur enn nøgd. Bæði pengapungurin og umhvørvið fáa gagn av, at tú ikki nýtist at skifta tíni ting út í heilum.
8. Endurnýt í so stóran mun sum gjørligt. Í Føroyum er tað enn ikki møguligt at skilja alt rusk, og tí verður ruskið ei heldur gagnnýtt í so stóran mun sum aðrastaðni í heiminum. Hugsa teg tí væl um áðrenn tú tveitir ting burtur, ið kanska kunnu endurnýtast – one man’s trash is another man’s treasure!
9. Minst til at tað er munur á merkingunum á mati: “Best fyri”, “Síðsti nýtsludagur” og “Heldur sær í minsta lagi til”. Nýt vit og skil og hygg eftir, um maturin er spiltur, áðrenn tú tveitir hann burtur.
10. Skift einnýtislapparnar út við lappar úr bummull. Soleiðis slepst undan mikroplasti, tá lapparnir verða vaskaðir, og eisini halda teir longri enn teir bláu, gulu og ljósareyðu lapparnir.
Mest lisið í farnu viku
Samband
Heygsvegur 8
490 Strendur