Mentanarnátt er í Reykjavík í dag, har Tórshavnar kommuna er boðin við sum heiðursgestur. Mentanarnáttin og Reykjavík marathon fellur á sama dag, og øll mentamálanevndin og borgarstjórin hava meldað seg til.

Reykjavík marathon er ein framúr væl umtókt kapping og eru fleiri túsund rennarar tilmeldaðir, eisini úr Føroyum. Tórshavnar býráð er umboðað í Reykjavík marathon av Hallu Samuelsen, Marin Katrinu Frýdal, Turið Horn, Anniku Olsen, borgarstjóra, Heðin Mortensen og Gunvør Balle, varaborgarstjóra.

Veljast kann í millum at renna 10 kilometrar, hálvt ella heilt marathon, og fyrstu rennararnir fóru avstað kl 8.40 í bakandi sól í Reykjavík.

Eftir renningina skal Annika Olsen, borgarstjóri, og Dagur B. Eggertson, borgarstjóri fyri Reykjavíkar kommunu, seta mentanarnáttina ráðhúsinum. Tá mentanarnáttin er sett, verður móttøka á Sendistovu Føroya, har Annika Olsen fer at bjóða vælkomin. 

Við í ferðalagnum eru tónlistafólkini Heiðrik av Heygum, Xperiment, Lena og Niclas umframt framsýningar við myndum og burðardyggum klæðum. Í sambandi við Mentanarnáttina fer mentamálanevndin at vitja stovnar, framsýningar og ítróttarhallir, ið arbeiða við mentan, ítrótti og trivnaði í kommununi.