Jarðfrøðingur rakt risa oljukeldu í Alaska
Nóg mikið av olju og gassi tykist vera undir jørð kring heim til at halda okkum heit og á ferð 100-200 ár fram, og/ella til vit finna aðrar varandi orkukeldur.
Nú vit eru við kolvetni, kann verða endurtikið, at kol er í jørðini til næstu 3-400 árini við verandi nýtslu. Kol verður sum kunnugt mest brúkt til at gera elorku.
Andøvsløtan nevndi herfyri um 2 risa gassfund í ísraelskum sjóøki, oljufund á Golanheyggjum, skiferolju í ómáldum nøgdum í Norðurdakota og Vesturtexas og eitt søgunnar størsta olju- og gassfund, ið Bahrain hevur avdúkað.
Herfyri fór eitt felag við støð í Denver USA at bora eftir olju í “Norðurbrekkuni” (North Slope) í Alaska út ímóti pólhavsísinum. Stjórin í felagnum Armstrong Oil & Gas er vanligur jarðfrøðingur, ið hevur havt stóran áhuga í olju.
Bill Armstrong byrjaði á berum, men hevur arbeitt seg upp saman við øðrum olju- og jarðfrøðingum, til teir nú við fígging ymsastaðni frá høvdu útvegað sær lendi og loyvi til at fara undir at bora í einum 160 km2 stórum øki, teir hava keypt á ístundruni í Alaska. Fox News bar hesi tíðindini í vikuni.
Fyrst mátti Armstrong Oil & Gas av strongum friðingarreglum gera ein 40 km langan ísveg, har teir sprændu vatn allan teinin, ið so frysti, og teir kundu flyta bori- o.a. arbeiðsútgerðina eftir hesi “skoytibreyt” til teirra boriøkið úti í oyðini.
Eitt borihol í Alaska kostar $ 50 mió (=300 mió kr) at gera. Hesir fyritaksomu oljufjepparar raktu olju við fyrsta skoti. Eftir at hava kannað oljuberandi løgini undir ístundruni í vetrarmyrkri 24/7 og í 30-40 froststigum staðfestu teir, at keldan fyribils mett goymir minst 150 mió tons av olju.
Gass verður einki nevnt um í greinini, ið Fox News hevur lagt út, men olja og gass finnast ofta hvørt um annað í somu jarðfláum.
Hetta man fara at loysa seg hjá hesum hepna amerikanska “gekkavinnara” til arbeiðis myrkri og kulda í Alaska saman við sínum vinmonnum og makkarum.
Mest lisið í farnu viku
Samband
Heygsvegur 8
490 Strendur