Uppskot um varskógvaraskipan løgd fyri Løgtingið
Í dag legði Kristina Háfoss, landsstýriskvinna í fíggjarmálum, fram uppskot til løgtingslóg um varskógvaraskipan fyri starvsfólk í almennum starvi.
Endamálið er at skapa størri opinleika og gjøgnuskygni í almenna geiranum, at styrkja rættartrygdina hjá starvsfólkum í almennum starvi, og at tryggja, at óreglulig viðurskifti verða fráboðað soleiðis, at almennir myndugleikar kunnu fáa viðurskiftini í rættlag.
Í Føroyum eru bert lógarkravdar varskógvaraskipanir innan fíggjargeiran. Við nýggja lógaruppskotinum verður varskógvaraskipan sett í verk fyri starvsfólk í almennum starvi hjá landinum. Landsgrannskoðanin fer eftir ætlan at umsita skipanina.
"Almenni geirin røkir týðandi og grundleggjandi uppgávur vegna alt Føroya fólk. Tað er tí av sera stórum týdningi, at starvsfólk, ið starvast í almenna geiranum kunnu kenna seg trygg við at fráboða møguligt óreglusemi innan tað almenna. Seinastu árini hava alsamt fleiri lond sett í verk varskógvaraskipanir - eitt nú fyri starvsfólk í almennum starvi - men í Føroyum eru varskógvaraskipanir enn bert settar í verk innan føroyska fíggjargeiran. Hetta vilja vit broyta. Málið er at betra almenna geiran, at veita størri opinleika og gjøgnumskygni í almennu fyrisitingini, og at styrkja rættindi hjá starvsfólkum í almennum starvi.” Tað sigur Kristina Háfoss, landsstýriskvinna í fíggjarmálum, á heimasíðuni hjá Fíggjarmálaráðnum.
Mest lisið í farnu viku
Havstovan tilmælur at stongja tað mesta
Samband
Heygsvegur 8
490 Strendur