Fáur hatar USA meiri enn amerikanski vinstravongurin, serliga í Hollywood, sum við hori og morði, blóði og sori heldur seg vera moralsins vaktarmenn.

Alt tað ringa í heiminum fær USA skyldina fyri, og alt tað góða í USA eigur mannaættin, hvør hanus og janus, eisini í heimsins pestholum, heiðurin av.

USA fær skyldina fyri, at indianar næstan doyði út av meslingum, pokum, beinkrími, og alkoholismu. USA skal hava uppfunnið trælahald (ið er javn-gamalt við mannaættina), kríggj, mafiu, drøgg, kolvetnisútlát, atomorku o.a.m.

Onkur mátti takka fyri m.a., at USA knústi týska keisaran, Hitler, Mussolini og japanska Tojo, og at USA hungraði Sovjet og WAPA í hel í Kalda krígnum.

Onkur mátti takka USA fyri Marshallhjálpina, ið bygdi Evropa og Vesturheimin uppaftur eftir nazitýsku og japansku krígsoyðingina. Um USA ikki vardi Evropa og heimin frá 1945-1991, ráddu Sovjet og kommunisman øllum. 

Hollywood hevur nú gjørt ein film um amerikansku mánalendingina í 1969. Rúmdarmenninir Buzz Aldrin og Neil Armstrong, ið var fyrsti maður at ganga á mánanum og setti Stars and Stripes niður har, eru høvuðspersónar.

Kanadiski filmsleikarin, Ryan Gosling spælir leiklutin sum Armstrong. Hann sigur tey heimsgitnu orðini hjá Armstrong, at hann “tók eitt lítið fet sum maður, men eitt risa framstig fyri mannaættina.” Filmurin verður vístur frá 3. oktober.

Daily Telegraph hevur spurt Ryan Gosling, hví filmurin ikki vísir, tá ið hann sum Neil Arnstrong setti Stars and Stripes niður í sandin á mánanum, svarar Gosling, at Hollywood helt tað vera óhóskandi, tí “ikki bert amerikanar og USA, men øll mannaættin eigur heiðurin fyri rúmdarferðina hjá Apollo 11.”

Gosling greiðir víðari frá, at hann hevur tosað við familjuna hjá Armstrong, og tey hildu skyldmannin vera so lítillætnan, at hann hevði helst hildið, at Stars and Stripes hevði argað fleiri áskoðarar til filmin enn glett tey!

Filmurin um “Fyrsta mann” á mánanum er enn eitt dømi um, at vinstrahalla Hollywood roynir at brongla og broyta amerikansku og heimssøguna.

Tað er jú søgufalsan at geva øðrum londum og fólkum æruna fyri, at USA við amerikanskum rúmdarfari og rúmdarmonnum setti Stars and Stripes á mánan.