Enskir grannar til hendurs á nátt um heidna gudadyrkan
Eini pensjónerað hjún í Dorset hava fingið dóm fyri vápnað álop á teirra heidna granna eina fullmánanátt í november í fjør, skrivaði Mail Online herfyri.
Grannin sigur seg vera “druid”. “Druidur” er heitið á einum fornum keltiskum presti. Mansins kristna navn er John Bennett. Men hann krevur at verða nevndur Bearheart (Bjarnahjarta), ið hann hevur tikið sum sítt prestanavn.
Teir dømdu áleypararnir vardu seg í rættinum við, at tey mistu tolið við goraganginum frá heidnu mánaðarligu náttarritualunum hjá druidinum.
Hvønn fullmánað sluppu Mark og Anne Denyer ikki at sova, sum Bjarnahjarta leikaði í við fornum, heidnum sangi, dansi, lúðrablástri í neytahorn og trummusláttri hinumegin stikið í grannagarðinum. Offurroykur stakk í nasarnar
Gudatænasturnar hjá grannanum blivu ovmikið. Eina mánalýsisnátt í nov. í fjør skeldaðust tey bæði við grannan ígjøgnum runnarnar millum húsini.
Tá tað ikki hjálpti, herjaðu tey á dansandi, syngjandi, lúðrablásandi og trummusláandi Bjarnahjarta, meðan tjararroykurin huldi tann ofrandi druidin.
Konan, Anne Denyer, sló druidin við einum samanrullaðum regnskjóli. Men tá tað ikki hjálpti, og Bjarnahjarta bara leikaði enn meiri í, stakk maðurin, Mart Denyer, tann algoysta og sveittandi heidnaprestin við einum køksknívi.
Bjarnahjarta er væl í holdum og vigar 140 kilo. Hann var væl bjálvaður hesa náttina í vovnum og tøvdum keltiskum prestakoti, so tað samanrullaða regnskjólið rein ikki við hann, og køksknívurin gjørdi honum ikki mein heldur.
Men áleypararnir vórðu drigin fyri rættin, har tey søgdu seg vera ósek í ákærunum hjá Bjarnahjarta og konu hansara, prestinnuni Samantha Hathaway (í nakað sama vektklassa sum maðurin).
Dómarin segði, at gartanin hvørja fullmánanátt, og stuðul frá øðrum grannum, ið søgdu seg ilskast mest inn á tjararroykin úr havanum frá brenniofrunum hjá Bjarnahjarta og konuni, slapp áleyparunum undan fongsulsrevsing.
Tey bæði Mark og Anne Denyer fingu tó treytaðan dóm. Einki er frætt, um Bjarnahjarta skal gevast við heidnu ritualunum og/ella skifta trúgv.
Mest lisið í farnu viku
Samband
Heygsvegur 8
490 Strendur