Fara aftur at velja Ársins Virki og Ársins Átak
Vinnararnir verða avdúkaðir í Norðurlandahúsinum fríggjadagin.
Árligi Vinnudagurin verður fríggjadagin, og har verða aftur í ár Ársins Virki og Ársin Átak kosin.
“Endamálið við hesum er at menna vinnuligan hugburð og økja um virðingina fyri vinnuni hjá myndugleikum og borgarum,” sigur Føroya Arbeiðsgevarafelag á heimasíðuni hjá Vinnuhúsinum.
“Endamálið er eisini at geva virkjum, sum á einhvønn hátt hava klárað seg væl, eitt herðaklapp og treysti til at halda fram á somu kós,” sigur felagið.
Tað er ein dómsnevnd, ið er vald av nevndini í Føroya Arbeiðsgevarafelag, sum velur Ársins Virki. Umframt at leggja dent á fíggjarlig úrslitið seinastu árini, hyggur dómsnevndin eisini eftir, um fyritøkur hava víst framfýsni og áræði á ymiskum økjum, og um hetta hevur viðført menning og vøkstur av fyritøkuni.
Umframt heiðurin fær Ársins Virki eina serliga standmynd, ið er gjørd til endamálið. Talan er um eina standmynd, sum er stoypt í bronsu.
Ársins Átak
Meðan Ársins Virki hevur verið kosið á hvørjum ári, so verður Ársins Átak bara kosið, tá mett verður, at ein fyritøka ella persónur hevur gjørt eitt serligt átak, ið kann gagna vinnuligum framburði. Talan kann vera um eitt átak, men tað kann eisini vera arbeiði, sum er gjørt í longri tíð. Sama dómsnevnd sum velur Ársins Virki velur Ársins Átak.
Fyri Ársins Átak verður latin ein standmynd, sum er eitt V úr stáli við búmerkinum hjá Føroya Arbeiðsgevarafelag graverað í.
Hvør ið verður Ársins Virki og Ársins Átak 2018 verður avdúkað á Vinnudegnum, sum verður í Norðurlandahúsinum fríggjadagin.
Mest lisið í farnu viku
Samband
Heygsvegur 8
490 Strendur