Samgongulimur: Tunnilin til Fámjins verður boðin út í morgin
Enn situr Henrik Old sum landsstýrismaður við samferðslumálum, og okkurt bendir á, at líkamikið hvat samgongan annars heldur, so fer hann í morgin at bjóða arbeiðið út at gera tunnil til Fámjins.
Hóast samgongufundur var í morgun, so bleiv heita evnið, tunnilsmálið, als ikki viðgjørt á fundinum. Henrik Old, landsstýrismaður við samferðslumálum, kom ikki á fundin, fyrr enn beint áðrenn fundurin endaði, og tá skuldi tingfundur byrja. Okkurt bendir á, at tað var eitt taktiskt val hjá landsstýrismanninum, at hann helt seg burtur, meðan samgongufundur var.
Kristin Michelsen segði við R7 í gjár, at tá uppskotið til fíggjarlóg fyri 2018 varð lagt fram fyri einum ári síðani, var tunnilin til Fámjin partur av uppskotinum. Men tá uppskotið kom aftur úr nevnd, var Fámjinstunnilin tikin burtur. Tá spurt var um hví, var svarið, at Fámjinstunnilin skuldi bjóðast út saman við Hvalbiartunlinum.
Tann 7. februar segði Henrik Old í sambandi við ein fyrispurning í løgtinginum, at tá Hvalbiartunnilin verður boðin út, verður tað ein treyt, at tann sum bjóðar, skal eisini geva eitt boð upp á tunnil til Fámjins.
Hesa semjuna heldur landsstýrismaðurin seg framvegis til, og nú siga keldur í samgonguni, at landsstýrismaðurin fer í morgin at bjóða arbeiðið uppá báðar tunlarnar út.
Mest lisið í farnu viku
Samband
Heygsvegur 8
490 Strendur