Úr útheiminum
Ein samling av stuttum tíðindum úr útheiminum.
Vøksturin í livialdrinum í Bretlandi er steðgaður
Sambært AFP er miðallivialdurin í Skotlandi og Wales lækkaður, og fyri fyrstu ferð síðani 1982 hækkar livialdurin í øllum Stórabretlandi ikki. Tað vísa hagtøl, sum vórðu løgd fram í gjár.
Útlitini fyri livialdrinum hjá bæði monnum og kvinnum eru fallin við 0,1 prosenti í bæði Skotlandi og Wales, og tað sama er galdandi fyri menn í Norður Írlandi. Tað sigur almenna bretska hagstovan ONS.
Atkvøða um Kavanaugh fríggjadagin
Rættarnevndin í amerikanska Senatinum skal fríggjamorgunin klokkan 9:30 atkvøða um Brett Kavanaugh kann innstillast til starvið sum hægstarættardómari. Tað upplýsir CNN. Hetta merkir, at atkvøðugreiðslan verður dagin eftir at hann og kvinnan sum hevur skuldsett hann fyri kynsligt brotsverk, Christine Blasey Ford, hava vitna fyri nevndini.
Valls ætlar at gerast borgarstjóri í Barcelona
Fyrrverandi franski forsætismálaráðharrin, Manuel Valls, segði á eini vitjan í spanska býnum Barcelona í gjár, at hann ætlar at stilla upp sum borgarstjóravalevni í Barcelona. Tað skrivar tíðíndastovan AFP. Valls hevur spanskan pápa og sveitsiska mammu, og hann varð føddur í Barcelona. Í 1982 fekk hann eisini franskan ríkisborgararætt, skrivar NTB.
Fundur avlýstur, hóast eingin hevur biðið um hann
Amerikanski forsetin, Donald Trump, sigur, at hann hevur onga ætlan um at hitta iranska forsetan Hassan Rouhani, hóast báðir er til staðar á ST aðalfundinum í New York.
“Hóast eg havi fingi fyrispurningar um tað, so havi eg onga ætlan um at hitta iranska forsetan Hassan Rouhani,” skrivaði Trump á Twitter.
Men hetta undrar Rouhani, tí sambært honum hava hvørki hann ella nakar annar í iransku leiðsluni biðið um nakran fund við Donald Trump.
“Ikki í ár, ikki í fjør. Vit eru ongantíð komin við nøkrum fyrispurningi um ein tílíkan fund við amerikanska forsetan,” sigur Rouhani við CNN.
Loyva Aquarius at leggja at bryggju
Myndugleikarnir á Malta vilja loyva bjargingarskipinum Aquarius at leggja at bryggju, men tey 58 fólkini sum eru umborð á skipinum skulu flytast til fýra onnur lond í Europa, sigur stjórnin í Valletta. Frakland, Spania, Týskland og Portugal eru vorðin samd um at býta fólkini ímillum sín, upplýstu spanskar, franskar og portugisiskar stjórnarkeldur í gjárkvøldið. Tað skrivar NTB.
Mest lisið í farnu viku
Havstovan tilmælur at stongja tað mesta
Samband
Heygsvegur 8
490 Strendur