Bretar elska sítt almenna heilsuverk, NHS, og vildu ikki fyri nakað í verðini av við tað. Men fá gremja seg meir um heilsuverkið enn bretar, við góðari grund.

Í spurnarkanning fyri og aðrari eftir sigur meirilutin av bretum, at tey vildu goldið meiri skatt fyri at bøtt um sínar heilsutænastur.

Konservativa stjórnin hjá Theresu May hevur nú tikið fólk upp á orðið, leggur spariknívin á hillina komandi 5 árini og hækkar árligu játtanina til heilsuverkið á bretsku fíggjarlógini við 3,4% til meiri “kunstigan andadrátt”.

Vit hoyra eina gølusøgu um NHS fyri og aðra eftir: Sjúkrarøktarfrøðingar o.a. heilsustarvsfólk eru opinlýst misnøgd við støðuna og rýma úr arbeiði skjótari, enn nýggj koma til. Bíðitíðin eftir sjúkarbilum og bráðviðgerð er deyðiligur, maturin ikki etandii og reinførið so lágt, at fólk doyggja í hópatali av smittum.

Hægri játtan til NHS kemur, eftir at ein sammetandi kanning við 21 OECD lond kring heim vísir, at bretska heilsuverkið er eftirbátur á so mongum økjum.

Eitt nú liggur Bretland á 19. plássi í tali á læknum eftir fólkatali, nr 16 í sjúkra-systrum og nr 18 í tali á seingjaplássum.

Bretland hevur 2,8 læknar pr 1000 íbúgvar (hálvt so nógvar sum Eysturríki). Bretland hevur færri enn 8 sjúkrasystrar pr 1000 íbúgvar (Sveis hevur 18). Bretland hevur 2,6 sjúkrasengur, Týskland hevur 8,1 pr 1000 fólk.

Greiningin vísti eisini, at Bretland hevur fæst MRI og CR skannarar í OECD.

Og tó... Bretland brúkar størri lutfall av sínum BTÚ, 9,7%, enn hini 21 OECD londini, nevniliga 9,6%, í miðal. So Bretland fær minni fyri pengarnar enn hini.

Tað bendir á, at NHS er nógv minni effektivt fíggjarliga og kostar nógv meiri pening lutfalsliga enn restin av hinum OECD-londunum í miðal.

Bretskir myndugleikar áttu at stramma mannagongdir upp og gagnnýtt sína peninganýtslu til heilsu betur heldur enn bert at játta meiri almennan pening.

Stjórin í NHS, Simon Stevens, heldur á at grenja, at 3,4% hækking er ikki nóg mikið, og krevur, at “kunstigi andadrátturin” má vera minst 4% hægri árliga.