“Til vildar øllum kann eingin gera...” kvað skaldið á sinni. Tey vísdómsorð renna einum til hugs, nú tað ljóðar, at Harvard, elsta universitetið í USA, er skuldsett fyri at nokta kvalifiseraðum asiatum atgongd til fyrimuns fyri onnur.

Harvard verður annars roknað sum eitt hitt mest PC universitetið í USA, ið gevur sínum lesandi og kandidatum stjørnustatus sum Ivy League. Hvørji foreldur høvdu ikki viljað havt nóg klók børn og ráð til pláss á Harvard?

Tískil má ein spyrja, hvat Harvard nú hevur gjørt skeivt til verða skuldsett fyri at nokta asiatisk-amerikanum atgongd til fyrimuns aðrar “minnilutar”?

Jú, Harvard brúkar fortreytir sum at vera “fyrikomandi” og at hava “jaligan persónleika” sum hjáputur fyri at halda asiatum og eisini hvítum dreingjum við topp-karakterum úti og at taka kvinnur, útlendingar, svørt og spansktmælt við lægri karakterum inn ístaðin. “Margfeldni” (diversity) er herrópið.

Gravgangurin fyri at verða upptikin á Harvard er øðiligur. Bert 4,6% av øllum umsøkjarum sluppu inn í ár. Heili 19% eru asiatisk-amerikansk, ið annars umboða undir 5% av øllum amerikanum (= 5-ferðir teirra luftall í fólkatali).

Nú hevur ein felagskapur, ið kallar seg “Lesandi fyri rættvísari upptøku”, stevnt Harvard fyri rættin í Boston fyri diskriminering. Felagskapurin umboðar tey 43% av asiatiskum studentum, ið høvdu próvtøl, altso akademiskan førleika, til at verða upptikin, men ikki vórðu tað, hóast gávað, men “gul”.

Ákæran er, at Harvard brúkar “bleytar” upptøkutreytir til at halda m.a. etniskar kvotur ella “rasujavnvág”, tá ið tað velur út “skikkaðar” studentar. Somu rasistisku krøv vórðu brúkt, tá ið akademiskt skikkað jødisk lesandi ikki sluppu inn á Harvard í 1920- og 30-árunum, førir bólkurin av vrakaðum lesandi fram.

Universitetið vísir aftur slíkum ákærum og heldur uppá, at útrokningarnar hjá felagskapinum byggir á skeiv hagtøl og útrokningar.

Annars er tað víða kent, at alt USA longu í 1960-árunum fekk politiskt álagt at brúka “affirmative action” (positiva diskriminering), eitt sosialitiskt “newspeak” orð, ið merkir at lyfta nakrar bólkar (serliga svørt, brún og kvinnur) upp og halda øðrum bólkum niðri, serliga asiatiskar og hvítar amerikanskar menn.

Roynið tykkum nú, PC lærustovnar, ið ivaleyst eru vilt yvirvurderaðir.