Ísrael skakað av politiskari njósnaragølu
Í summar hava ísraelar aftur fylgt við einum afturvendandi rættarmáli móti frv ísraelska politikaranum, Gonen Segev, nú 62 ára gamal. Ein løgin lagna. Gonen gjørdi sum allir aðrir ísraelar, menn sum kvinnur, hertænastu og bleiv enntá kapteinur. Eftir tað fór hann at lesa medisin og gjørdist barnalækni.
Síðan fór hann upp í politikk, fyrst í einum lítlum ortodoksum flokki, ið var hart ímóti at uppgeva nøkur av teimum umstríddu økjunum eystan- og vestanfyri.
Men so hálsaði hann um og fór upp í Arbeiðaraflokkin, ið tá varð stýrdur av Yitzak Rabin og Simon Peres. Tað var atkvøðan hjá Gonen, ið tryggjaði politiskt fleirtal fyri tí vanlukkuligu Oslo-avtaluni millum Rabin og Arafat.
Teir báðir leiðararnir fingu fyrst friðarløn Nobels, men síðan kostaði avtalan Rabin lívið og útloysti síðan næstu og blóðigu antifadaduna. Rabin grunaði, at Oslo-avtalan við PLO varð trýst niður yvir Ísrael fyri at tryggja Clinton arvin. Men Rabin var ov veikur til at standa ímóti freistingini at skapa frið í Miðeystri.
Oslo-avtalan koyrdi Ísrael út á ta 25 ára longu oyðimarkargongdina, kallað “Friðartilgongdin í Miðeystri.” Hon er tó nyttuleys, tí einki arabiskt land, minst Iran og palestinar vilja frið við Ísrael. Men Bill Clinton fekk sín politiska arv.
Fyri síni avrik gjørdist Segev Gonen ráðharri hjá Labour í orku og infrakervi.
Hesin Gonen má vera ein løgið samansettur persónur, tí av yrkisliga og politiska tindinum í 1990-árunum fall hann so djúpt, at hann í 2005 varð dømdur fyri at innflyta óløgliga 25.000 ekstasi drøggtablettir og fyri fíggjarsvik.
Nú hevur hann aftur fingið oyruni í rættarmaskinuna undir ákæru fyri at hava njósnast fyri Iran, deyðsfígginda Ísrael. Gonen hevur fjalt seg í Nigeria.
Løgreglan í Ekvatorial Guinea handtók hann í summar og flýggjaði ísraelsku innlendis trygdartænastuni, Shin Beth, mannin. Síðan hevur ein dómstólur í Jerusalem havt hann til rættarviðgerðar.
Ákæran er, at Gonev hevur njósnast fyri Iran og hjálpt fíggindalandi í krígstíð.
Jerusalem Post og Haaretz skriva, at sakarmálið er handan stongdar dyr. Segev Gonen sjálvur heldur upp á, at hann er ósekur í ákærunum, og at hann bert royndi at stuðla Ísrael við at finna veikleikar í og hóttanina frá Iran.
Mest lisið í farnu viku
Havstovan tilmælur at stongja tað mesta
Samband
Heygsvegur 8
490 Strendur