Nigeria er enn hættisliga ótrygt
Nigeria er skakað av fleiri ótespiligum tilburðum í summar. Landið hevur tað strævið í løtuni, tí tess stóru oljukeldur hava ikki tjent so nógv hesi farnu 5 árini við lágum oljuprísum.Tó er olja enn nógv størsta útflutningsinntøkan.
Ofta verða Nigeria og Suðurafrika sammett í afrikanskum høpi.
Tað fruktagóða Nigeria er fólkaríkasta land í Afrika við 190 mió íbúgvum. Tað hevur næstan 4 ferðir fleiri fólk enn Suðurafrika við nógv sterkasta búskapi í Afrika. Til víddar er Nigeria 925.000 km2, ið er 1/3 minni enn Suðurafrika.
Fólkasløgini eru mong, men átrúnarliga er sunnari helmingur kristin og norðari muslimskur. Átrúnaður er, sum so mangan við islam, høvuðsorsøk til stríð.
Norðanfyri hava muslimskir bólkar herjað og gjørt seg inn á kristin. Nógv fólk eru deyð. Boku Haram hevur rænt nógv fólk, m.a. kristnar skúlagentur.
Nigeriski herurin hevur hesi farnu 2 árini roynt berja muslimska Boku Haram niður, og í vár boðaði stjórnin í Ajuba frá, at nú var friður har norðuri.
Men ikki var meiri enn hálvtalað orð, tá Boku Haram sprongdu bumbur og skutu rakettir í býnum Damboa, har 43 fólk lótu lív og fleiri túsund flýddu.
So mátti herurin aftur leypa á fyri at rudda Boku Haram burtur av leiðini.
Tá frættist, at 1000-tals kvinnur og gentur, ið stjórnarherurin hevði bjargað frá Boku Haram, eru neyðtiknar, hungraðar í hel og dripnar saman við øðrum í hernarlegum, sum herurin hevur brúkt í bardøgum móti Boku Haram.
Amnesty International hevur útgivið eina frágreiðing: “Tey sviku okkum,” har 250 fólk eru spurd um støðuna farnu 2 árini. Tey eru samd um, at vanlig mannagongd hevur verið, at hermenn hava neyðtikið gentur aftur fyri mat.
AI hevur funnist at bretsku stjórnini, tí hon ger nigerianska herin út við vápnum, og bretskir ráðgevar í stórum tali venja landsins hermenn.
Bretska stjórnin hevur verið í øðini við leiðararnar í Ajuba, sum ikki eru førir fyri at svara, hví slíkur fjandanskapur tykist vera vanlig mannagongd, tá hermegin í Nigeria arbeiðir fyri og skal verja landsins mest sárbæru fólk.
Mest lisið í farnu viku
Samband
Heygsvegur 8
490 Strendur