Nú treingist aftur um islamskar kvinnur, ið royna at vinna rættindi
Tað gongur striltið hjá muslimskum kvinnum at vinna sær rættindi. Best sum ein glotti hómast, trýsta leiðararnir afturímóti, so vunnin rættindi verða mist.
Tað hevur sviðið at saudiskum kvinnum, ið hildu seg fáa stuðul frá saudiska arvaprinsinum, ið segði seg vilja loyva kvinnum at velja nøkur umboð í býráð, at opna egna bankakontu, at fáa pass, at fara út sjálvar og enntá at koyra bil.
Men beint sum saudiska lógin, ið loyvir kvinnum at koyra, kom í gildi, vórðu 11 kvinnur tiknar í Riyadh og ákærdar fyri at vinna kvinnum rætt at koyra bil!
4 eru síðan leyslatnar, ein teirra 70 ára gamla Aisha-al-Manea, ið er veteranur fyri kvinnurættindum í Saudi Arabia og sigst hava ringa heilsu.
Men hinar eru vist enn í varðhaldi, skuldsettar fyri illgrunasamt samband við “fíggindar uttanlands.” Tær kunnu fáa áralangt fongsul fyri undirgraving. Málið hjá stjórnini í Riyadh er at ræða aðrar kvinnur frá at destabilisera samfelagið.
Samstundis sum saudiska stjórnin táttar kverkratakið um kvinnur, ið ætla sær og sínum landskvinnum nøkur rættindi, handtók prestastýrið í Tehran eina av landsins mest gitnu løgfrøðingum í mannarættindum, Nasrin Sotoudeh.
Hon fekk at vita, at hon var dømd “in absentia” (meðan hon var fráverandi), og at hon skal sita 5 ár í fongsli, upplýsir familjan.
Hendan Sotoudeh er ikki hvør sum helst, tí hon fekk Sakharov-virðisløn frá ES í 2012 fyri arbeiði hennara fyri mannarættindum.
Dómarin segði, at hon var funnin sek í og dømd fyri propaganda ímóti iranska statinum og fyri at hava samstarvað við ein annan ákærdan. Hetta kann vera ein, ið hon vardi í rættinum móti høpisleysum politiskum skuldsetingum.
Viðkomandi er helst ein iransk kvinna, ið saman við øðrum hevur mótmælt alment ímóti iransku hijab-lógini. Undir kravgonguni tóku kvinnurnar turriklæðið av og veitraðu við tí í luftini.
Annars hevur tann nú 55 ára gamla Nasrin Sotoudeh eisini vart aðrar andstøðingar hjá prestastýrinum í Tehran, m.a. ungar menn, ið vórðu ákærdir og seinni avrættaðir fyri átrúnarlig “brotsverk,” tá ið teir vóru ómyndingar.
Mest lisið í farnu viku
Havstovan tilmælur at stongja tað mesta
Samband
Heygsvegur 8
490 Strendur