Tølini fyri inntøkuskatt hjá kommununum síggjast á heimasíðuni hjá Gjaldstovuni. Vit hava hugt eftir inntøkunum hjá Runavíkar og Klaksvíkar kommunu. Vit hava frætt at inntøkan er minni enn seinsta ár og tað vísa tølini rættuliga greitt. 

Roknast kundi við hesum, tá báðar kommunurnar liva av framleiðslu og har er toppurin helst longu farin fram við. 

Um vit hyggja eftir Runavíkar kommunu, so var skattainntøkan í september í 2017 12,95 mió. Í ár er inntøkan 12,15 mió. 

Hjá Klaksvík er minkingin enn størri. Í fjør gav september 16,36 mió. Í ár gav september bara 14,97 mió. Tað er ein sera stór minking. Meðan inntøkan í Runavík minkaði 6,2% so var minkinigin í Klaksvík heili 8,5%

Um vit so rokna uppá inntøkurnar fyri alt árið, so sær út til at samlaða inntøkan í 2018 verður lægri enn í 2017.

Um vit upprokna inntøkuna fyri fyrstu 9 mánarnar til heilt ár, so verður inntøkan fyri alt árið 0,7% lægri enn í 2017 hjá bæði Runavíkar og Klaksvíkar kommunu.

Tølini fyri lønarútgjaldingar sum hagstovan kunngjørdi hósdagin vísir tað sama. Tað eru lønir hjá mannfólki, sum minka og tað er í fiski- og alivinnuni at lønirnar minka.