ICES mælir til at hækka kvotuna av norðhavssild við 53 prosentum
ICES hevur í dag almannakunngjørt mest loyvdu veiðu fyri norðhavssild fyri komandi ár.
Eftir at ICES hevur staðfest, at tað var ein burðardygg umsitingarætlan, sum strandarlondini samdust um fyrr í hesum mánaðinum, hevur felagsskapurin mælt til at hækka kvotuna av norðhavssild við 53 prosentum í mun til í fjør. Tað skrivar Havstovan.
“Gýtingarstovnurin av norðhavssild er 3,859 mill. tons í 2018 og tað er omanfyri nýggja markið í umsitingarætlanini fyri nær varsemi skal vísast,” sigur Havstovan. “Hetta førir við sær, at ikki er neyðugt at lækka veiðitrýstið vegna varsemisregluna,” siga tey.
Markið hækkar
Strandarlondini hava í nýggju umsitingarætlanini gjørt av at hækka markið fyri, hvussu nógv kann fiskast úr stovninum hvørt ár. Í gomlu umsitingarætlanini var hetta talið 0,125, meðan veiðitrýstið í nýggju umsitingarætlanini er sett til 0,14.
Stovnurin av norðhavssild er í minking og hevur verið tað síðani 2009, hóast veiðitrýstið minkaði í tíðarskeiðinum 2010-2015. Veiðitrýstið er vaksið aftur síðani tá.
“Ein høvuðsorsøk til minkingina er, at tilgongdin hevur svikið hetta tíðarskeiðið. Tó er ein glotti at hóma, nú 2016-árgangurin er mettur at vera oman fyri miðal,” sigur Havstovan.
Mest lisið í farnu viku
Havstovan tilmælur at stongja tað mesta
Samband
Heygsvegur 8
490 Strendur