Bárður S. Nielsen, løgtingsmaður, fer á tingfundinum í morgin at seta ein munnligan fyrispurning til Kristinu Háfoss, landsstýriskvinnu, um niðurgjalding av skuld.

Løgtingsmaðurin spyr hvussu nógv landsstýrið hevur niðurgoldið av skuldini higartil í hesum valskeiðnum, og eisini spyr hann, hví landið upptekur nýggj lán, nú búskaparligt viðrák hevur verið í fleiri ár?

Í viðmerkingunum til spurningin sigur Bárður Nielsen, at tá ið fíggjarlógin varð framløgd og viðgjørd í løgtinginum bleiv fer eftir fer tosað um, hvussu nógv henda samgongan hevði bjálvað samfelagið til betri tíðir.

“Upplýst varð, at allir kassar eru fullir, stórt yvirskot á landskassaroknskapinum og at skuld var niðurgoldin,” sigur løgtingsmaðurin.

“Men í búskaparfrágreiðingini frá fíggjarmálaráðnum verður upplýst, at onki er goldið av skuldini hjá landinum higartil í hesum valskeiðnum og í fíggjarlógaruppskotinum verður upplýst, at landið skal upptaka nýtt lán á 400 mió. krónur fyri at endurfíggja skuldina,” sigur hann.

“Hóast nógv reyp um stór yvirskot í hesum valskeiðnum má staðfestast, at pengar mangla í kassanum og lán mugu upptakast í bestu búskapartíðum nakrantíð,” sigur Bárður Nielsen.

Munnligir fyrispurningar standa á skrá fyri tingfundin í morgin.