Veðurlagið:

Eitt lágtrýst, 998 hPa, við Hvarvið, flytur seg í ein landnyrðing. Tilhoyrandi hitabrúgvin við regni kemur inn yvir Føroyar av útsynningi. Hósdagin streymar køld luft norðaneftir inn yvir Føroyar við ælaveðri, sum kann vera vátaslettingur ella kavi.

Veðurvánirnar:

Andøvsgul til strúk í vindi av útnyrðingi, 8 til 13 m/s, sum út á dagin minkar niður í lot til andøvsgul, mest av norðri, 2 til 7 m/s. Tað verður fyrst nakað av sól og turt fyri tað mesta, men út á seinnapartin verður meira skýggjað og nakað av regni av og á. Hitin fer at liggja millum 5 og 10 stig. Í kvøld verður lot av ymsum ættum, minni enn 3 m/s. Í nátt veksur vindurin til gul til frískan vind av landsynningi, 5 til 10 m/s. Tá verður skýggjað og regn av og á. Hitin hækkar til millum 7 og 10 stig.

Veðrið mikudagin:

Gul til frískan vind av landsynningi, 5 til 10 m/s, sum snarar í útsynning og vestan, og veksur til frískan vind til hvassan vind, 10 til 15 m/s. Tað verður skýggjað og sirm av og á. Hitin fer at liggja um 10 stig. Í annaðkvøld verður ættin fyri tað mesta vestan og hósnáttina minkar vindurin nakað. Tá verður skýggjað fyri tað mesta og sum frá líður fyri tað mesta turt. Hitin fer at liggja millum 5 og 8 stig.

Veðirð hósdagin:

Gul til frískan vind av vestri, 5 til 10 m/s, sum snarar í norðan og fríggjanáttina veksur vindurin til frískan vind til hvassan vind, 10 til 15 m/s. Tað verða løtur við nakað av sól ella sólglottum, men tað verða eisini æl, sum kunnu vera heglingur ella vátaslettingur. Hitin um dagin fer at liggja millum 5 og 8 stig, um náttina millum frostmarkið og 5 stig.