EIN ALMENNUR BUSTAÐARBANKI ER HELST KÆRKOMIN
Ein almennur bústaðarbanki er helst kærkomin, men hann loysir ikki akutta bústaðartrupulleikan. Tann trupulleikin kemst fyrst og fremst av einari upphitaðari byggivinnu og tískil høgum bústaðarkostnaði. Leigubústaðir er tað, sum mest bráfeingis tørvur er á, men tað nyttar lítið at byggja leigubústaðir, um byggikostnaðurin er so høgur, at ongin hevur ráð at leiga.
Niðanfyri er partur av røðu, eg hevði í tinginum í dag í sambandi við uppskotið hjá Miðflokkinum um at brúka almenna ognarlutin í BankNordik til at stovnseta ein almennan bústaðarbanka við.
Eg haldi eisini, at hetta uppskotið er tiltalandi, tí eg síggi onga meining í, at tað almenna eigur stóran ognarlut í einum banka, um hesin ognarlutur ikki kann brúkast til nakað sum helst.
Men eg haldi eisini, at hetta uppskotið heldur eigur at verða tikið við í hugskotsbankan, nú arbeitt verður við at snikka saman ein bústaðarpakka, sum skal tryggja, at vit fáa ein góðan og fullfíggjaðan bústaðarpolitikk.
Orsøkin til, at eg tók orðið, er tó í fyrsta lagi at ávara ímóti at halda, at hetta uppskotið loysir bústaðartrupulleikarnar í Føroyum, um tað verður samtykt.
Tí hvat er tann veruligi trupulleikin á føroyska bústaðarmarknaðinum?
Teir eru nógvir, vilja fleiri helst siga, og tað er eisini rætt. Trekir fíggingarstovnar er ein trupulleiki.
Men tann heilt stóri trupulleikin, sum eg síggi hann, er kostnaðurin. Tað er himmalhøgi prísurin fyri at byggja, sum aftur ávirkar prísin á tí, sum longu er bygt, og leigukostnað hjá teimum, ið leiga.
Og tað er tí, vit hava eina upphitaða byggivinnu, at prísurin er vorðin so ovurhonds høgur.
Tann trupulleikin verður ikki loystur við einum bústaðarbanka. Men tað er tó tann trupulleikin - høgi prísurin - sum hevur mest fyri neyðini at verða loystur skjótt. Har fyri kunnu vit sjálvandi sagtans loysa aðrar trupulleikar eisini, til dømis gera ein bústaðarbanka.
Men hvat kunnu vit gera við høga prísin?
Sum ein góður tjóðveldismaður haldi eg sjálvsagt, at vit skulu sláa manngarð um føroyska vinnu og føroyska framleiðslu.
Tá tað tænir henni.
Men í løtuni tænir tað absolutt ikki byggivinnuni og enn minni føroyska samfelagsbúskapinum at seta enn meira ferð á heimligu byggivinnuna.
Tí mugu vit hugsa alternativt. Vit mugu finna alternativar loysnir. Hetta havi eg sagt fyrr her á tingi, og eg haldi enn, at vit mugu kanna, hvussu vit fáa bygt meira liðugt uttanlands og nógv bíligari enn í Føroyum, men undir leiðslu av føroyskum byggimeistarum, ið kenna til føroysk viðurskifti, veður og vind.
Tað mátti borið til at gjørt í londum, har byggivinnan ikki er ovurhitað, og í nógvum evropeiskum londum, sum hava eina eins kompetenta byggivinnu og vit, vita vit, at har er arbeiðsloysi; eisini í byggivinnuni. Ingolf S Olsen
Mest lisið í farnu viku
Samband
Heygsvegur 8
490 Strendur