Tað eru partar í flokkinum hjá Sjálvstýri, sum vilja hava Magna Laksáfoss í flokkin. Á landsnevndarfundi hósdagin fekst tó ikki meiriluti fyri hesum.

Á fundinum møttu umboð fyri valfeløgini, umboð fyri ungmannafelagið og tingmenn floksins.

Keldur í flokkinum siga, at tað serliga er fiskivinnupolitikkurin, ið skilir partarnar. Í gjárkvøldið stóð at lesa á VP, at Rógvi Fossadal, landsnevndarformaður, segði, at Magni Laksáfoss var vælkomin í flokkin.

Sambært keldum í flokkinum var niðurstøðan ein heilt onnur. Tað var nevniliga ein breiður meiriluti í móti, at Magni Laksáfoss kemur í flokkin.

Í viðmerking til R7 sigur Olgar Nielsen, formaður fyri Unga Sjálvstýri, at hann er harðliga ímóti at Magni Laksáfoss kemur upp í flokkin.

-  Eg havi ikki álit á Magna Laksáfoss, tí hann hevur trupulleikar við samstarvi og fór aftur um formann flokksins í síni roynd at koma upp í Sjálvstýri, sigur formaðurin í Unga Sjálvstýri við R7.

Tað tykist vera greitt, at ein meiriluti í landsnevndin sigur nei til at Laksáfoss kemur í flokkin og verður valevni hjá Sjálvstýri.