Nú verður gjørt nógv burturúr, at stuðul úr Danmark Kr. 9,5 mió kr er latin til mentannartiltak í Klaksvík. Áður var stuðul úr Danmark latin til Salt á Tvøroyri.

Fyrra byrðan varð borin í biddaraposanum hjá Edmund Joensen fólkatingsmanni, seinna varð borin í biddaraposanum hjá Sjúrði Skaale.

Báðar "gávurnar" treytaðu, at Salt kundi fullførast, og at mentanarhúsútbygging í Klaksvík gerst veruleiki.

Hesar gávur hava givið bakbrot í Tjóðveldi:  "Vit skulu ikki fáa nakað úr Danmørk"! Meðan goymdu gávurnar til Tjóðveldið úr Danmark verða trúliga avheintaðar umvegis fólkatingssessin.

Seinasti sjónligi bakstoytur er, at Annita á Fríðriksmørk er, sum vant, farin at senda litfagrar rakettir upp í loftið í samband við hennara ónøgd.

Rakettir bergtaka okkum øll, so eg hyggi, tá hesar fara upp í loft. Har hendir ein eksplosión, og eitt satt elsdhav av litføgrum eldkúlum í alskins litum bergtekur míni og fleiri eygu, men...stutta løtu seinni verður stilt og myrkt, og einasta vón ella vandi, eg standi eftir við, er, um eg møguliga fái berirakettina , sum nú er myrk, í høvdið!?

Hví er skrivi hetta?

Sum sjálvstýrissinnaður ynski eg, at vit skulu klára okkum sjálvi. Við teimum peningaligu studningum, sum higartil eru komnir úr Danmark, so kenni eg meg sum smádrongurin í heiminum, sum verður stuðlaður og hjálptur at mennast, so tá hann er tilkomin, eigur hann at klára seg sjálvur, seta búgv undir egið borð. Men um hann framvegis verður stuðlaður heimanífrá, og setir krav um tað,  so gerst hann aldrin sjálvbjargin. Tað er tað, sum hendir í dag!

Og tá vit frætta, hvussu eykastór inntøka landskassans er í hesum góðu tíðum, so spyrji eg, hvar peningurin er staddur, sum skal gera statsstuðulin óneyðugan?  Hugsa bert um "smápengar" til at gera Glasir liðugt.

Her er bert ein loysn:  "Vit mugu fáa aðra leiðslu í stjórn landsins"!

Eyðun Mohr Viderø
28.11.2018