Aftursvar til greinina "Ov lítil ferð á grønu kósini"
Nú nevndin í SEV rør framundir, at ov lítil ferð er á grønu kósini og samstundis kemur til ta niðurstøðu, at aðrir aktørar enn teir sjálvir, herundir bóndin í Hoyvíkshaganum, eiga skuldina (ella eru meinbogin), loyva vit okkum at koma við hesum viðmerkingunum.
Vindrøkt hevur síðan 2003 áhaldandi arbeitt við at økja um nýtsluna av okkara grøna tilfeingi, og hevur í tí sambandi fyrireika seg til framtíðar útboð. Tá útboð hava verið hava bæði vindmátingar og onnur loyvi verði fingin til vega.
Eftir seinasta útboð, hevur myndugleikin útvalt 10 økir, sum teir meta egnaði til vindorku. Tvey av hesum økjum eru Junkarahagin í Kvívík og Hoyvíkshagin. Hesi økir hevur Vindrøkt samstarvsavtalu við, og eru sostatt klár hjá Vindrøkt at fara í gongd við.
Tey útboð, ið hava verið, hava verið skipað soleiðis, at ein ávísur máttur hevur verið boðin út á einum ávísum øki, ella á øðrum egnaðum øki, sum tann, sum bjóðar, hevur atgongd til ella nýtslusáttmála við. Júst sum leisturin í okkara grannalondum er.
Um Vindrøkt fær vissu frá orkumyndugleikunum fyri, at arbeitt verður eftir hesum sama leisti, kann t.d. vindmyllulundin í Hoyvíkshaganum verða klár komanndi ár, og geva uml. 6.000 húsarhaldum streym longu í 2019.
Harafturat kann SEV spara 30-40 milliónir krónur í oljunýtslu um árið.
Vindrøkt er ikki vitandi um, at onnur øki eru gjørd klár, hvørki av myndugleikanum ella SEV.
Um bara hesi bæði økini eru klár, eigur tað ikki at lastast Vindrøkt fyri at hava fyrireika seg, men liggur ábyrgdin hjá Orkumyndugleikanum og teirra ráðgeva - sum er SEV.
At so mynduleikin hevur roynt at takað økini frá Vindrøkt og bóndanum, er ein heilt onnur søga og skal ikki útdýpast meira her.
Vindrøkt og festarin í Hoyvíkshaganum, sum er nevndur í greinini, kunnu ikki góðtaka at verða ákærdir av SEV fyri at verða orsøk til, at vindorkan ikki er meira útbygd í Føroyum.
Tvørturímóti hevur Vindrøkt áhaldandi boðið sær til at fara undir verkætlanina í Hoyvíkshaganum, sum kann byrja at framleiða streym longu í 2019.
Um SEV ynskir at vera við í samstarvinum, eru teir vælkomnir til tað.
30. november 2018
Vindrøkt
Mest lisið í farnu viku
Samband
Heygsvegur 8
490 Strendur