Tað var um 8 tíðina í gjárkvøldið, at ein 29 ára gamal maður fór at skjóta móti eini mannamúgvu á kenda jólamarknaðinum í Strasbourg.

Óvist er hví maðurin skeyt.

Fronsku myndugleikarnir søgdu fyrst, at trý fólk vóru deyð, men í einum tíðindaskrivi í morgun verður sagt, at minst tveir persónar eru deyðir, og 13 hava fingið skaða í álopinum. 9 av teimum særdu skulu vera illa særd.

Blaðið Le Figaro skrivar, at maðurin skuldi verða handtikin í sambandi við eitt annað mál í gjáramorgunin, men tá løgreglan kom á staðið, var hann ikki heima. Harafturímóti vórðu fleiri aðrir persónar handtiknir á staðnum, og løgreglan fann eisini spreingievni heima hjá manninum.

Fáar tímar seinni fór hann at skjóta eftir fólki á jólamarknaðinum, sum hevur røtur heilt aftur til 1570.