Veðurlagið:

Eitt hátrýst, 1035 hPa mennist yvir Skandinavisku hálvoynni. Í morgin fer eitt djúpt lágtrýst, 965 hPa framvið Íslandi av suðri. Í vikuskiftinum nærkast eitt nýtt lágtrýst Íslandi, meðan hátrýstið yvir Skandinavisku hálvoynni viknar.

Veðurvánirnar:

Andøvsgul til strúk í vindi av suðri og landsynningi, 7 til 12 m/s. Tað verður samdrigið við regni og sirmi, kanska eisini támi. Seint í dag verður turt fyri tað mesta. Hitin fer at liggja millum 6 og 9 stig. Í nátt veksur vindurin sum frá líður til frískan vind til hvassan vind av suðri og landsynningi, 10 til 15 m/s. Tað verður turt og skýggjað fyri tað mesta. Hitin fer at liggja millum 5 og 7 stig.

Veðrið hósdagin:

Frískur vindur til hvassan vind av suðri og landsynningi, 10 til 15 m/s. Eitt skifti verður strúkur í vindi til skrið, 13 til 18 m/s við hørðum hvirlum. Tað verður turt og eitt skifti skýggjað, men móti fríggjanáttini verður samdrigið fyri tað mesta og løtur við regni. Hitin fer alt samdøgrið at liggja millum 5 og 8 stig.

Veðrið fríggjadagin:

Frískur vindur til hvassan vind av suðri og landsynningi, 10 til 15 m/s. Um kvøldið og náttina verður strúkur í vindi til skrið, 13 til 20 m/s við hørðum hvirlum. Tað verður skýggjað fyri tað mesta og fyrst á degnum verður onkrastaðni nakað av regni. Út á leygarnáttina fer at regna. Hitin fer alt samdøgrið at liggja millum 3 og 7 stig.

Veðrið leygardagin:

Frískur vindur til hvassan vind av suðri og landsynningi, 10 til 15 m/s, sum út á dagin minkar til andøvsgul til strúk í vindi av suðri, 8 til 13 m/s. Sunnunáttina verður ættin landsynning. Tá verður gul til andøvsgul, 4 til 7 m/s. Tað verður skýggjað og í løtum nakað av regni. Hitin fer alt samdøgrið at liggja millum 5 og 8 stig.

Veðrið sunnudagin:

Lot til andøvsgul av eystri sum seinni snarar vesturyvir, 2 til 7 m/s. Seinni verður ættin sunnan og vindurin veksur til gul til frískan vind, 5 til 10 m/s. Tað klárnar sum frá líður av vestri, tó verður møguleiki fyri einstøkum ælum. Út á náttina verður skýggjað og regn. Hitin fer alt samdøgrið at liggja millum 3 og 7 stig.