Tórshavnar kommuna hevur sett Margrethu Nónklett sum nýggjan leiðara fyri Tórshavnar býarsavn. Hon er 43 ára gomul og útbúgvin bachelor í folkloristik (tjóðminnafrøði) og cand.mag í evropeiskari etnologi (fólkalívsfrøði) frá lærda háskúlanum í Keypmannahavn.

Í løtuni starvast hon sum fulltrúi og toymisleiðari í Uttanríkis- og Vinnumálaráðnum og hevur eisini royndir m.a. sum dagligur leiðari fyri Amnesty International Føroya deild.

Starvið er nýtt, og høvuðsuppgávan hjá savninum er at lýsa menningina og tey mentanarligu og vinnuligu rákini, ið so ella so hava sett síni fingramerki á gerandisdagin hjá havnarborgarum og kommununi sum heild, serliga við denti á tíðarskeiðið frá miðskeiðis í nítjandu øld fram til nýggja tíð.

Margretha er ættað úr Lamba og búsitandi í Havn. Hon tekur við starvinum 15. august. Átta umsóknir vóru til starvið.

Soleiðis skrivaðu vit á R7.fo í Juni.