Bjóða nú eina norðatlantiska studentsútbúgving
Útbúgvingin byrjar í august í ár og umsóknarfreistin er 1. mars.
Sum nakað nýtt fáa ung úr Føroyum, Íslandi, Danmark og Grønlandi nú møguleikan at taka eina felags norðatlantiska studentsútbúgving. Tað skrivar Mentamálaráðið í tíðindaskrivi.
“Ung úr øllum fýra londunum koma í ein og sama flokk, sum fylgist øll trý árini, og undirvísingin fer fram á fýra norðatlantiskum samstarvsskúlum,” stendur í tíðindaskrivinum.
Fyrsta árið verður tikið á Gribskov gymnasium í Danmark, annað árið á Miðnámi á Kambsdali og Verzlonarskóla Íslands í Reykjavík og triðja árið á GUX Sisimiut.
Norðatlantiski flokkurin er rættaður móti næmingum, sum hava serstakan áhuga fyri teimum norðatlantisku samfeløgunum og náttúruvísindum.
“Tey trý árini í teimum fýra londunum fara at geva næmingunum eina serstaka fakliga og mentanarliga uppliving og útbúgving,” sigur Mentamálaráðið.
“Øll, sum hava gingið á einum studentaskúla, vita, hvussu nógv hesi trý árini eru við til at mynda og búgva okkum sum menniskju. Hesin flokkurin fer uttan iva at geva næmingunum nakað heilt serstakt og verður eitt upplivilsi fyri lívið,” sigur Páll Isholm, rektari á Miðnámi á Kambsdali.
Næmingarnir fara at hava felags lærugreinar, tó verður móðurmálsfrálæran hvør sær. Útbúgvingin byrjar í august í ár og umsóknarfreistin til norðatlantiska flokkin er 1. mars.
Mest lisið í farnu viku
Samband
Heygsvegur 8
490 Strendur