Altjóða greiningarstovnurin McKinsky & Co kunngjørdi herfyri, at yvir 10.000 kinesiskar fyritøkur arbeiða nú í Afrika. Kinesiska stjórnin er í holt við at yvirtaka Afrika í nógv størri mun enn evropisku hjálandaveldini í 19. øld og vesturlendskar fyritøkur eftir 2. Heimskríggj, tá Afrikansk lond fingu sjálvstýri.

Kina kroystir øll virði úr Afrika og skuldarbindur meginlandið við íløgum, handilshalli og statsskuld, tá afrikansku londini ikki klára sínar gjaldsskyldur.

Evropisku koloniveldini royndu at menna síni hjálond við íløgum í infrakervi, útbúgving av teirra afrikansku borgarum og við billióna $$ í menningarhjálp. Kinverjar gera einvegis íløgur í Afrika, skrivar Scott D. Taylor um kinesiskan politikk í Afrika í Current History 2018. Afrikanar merkja nú kinesiska rasismu.

Tá Mao Tse Dong var einaræðisharri í maoistiska Kina, var hetta heimsins fjølmentasta land eisini eitt hitt fátækasta, sum vant við sosialismu. Eftir Deng Hsiao Ping tók við valdi í 1980, setti kommunistiska stýrið í Bejing kapitalist-iskan búskap í verk, men tá var enn lítið samband millum Kina og Afrika.

Samhandilin er síðan 1980 øktur úr $ 1 mia upp í $ 300 mia í fjør. Kina keypir rávørur úr Afrika, og Afrika innflytir framleiddar vørur úr Kina. Tí eru handils-hallið og nú skuldin hjá Afrika til Kina risa stór og ágóðin hjá Kina tilsvarandi.

Seinnu ár hevur ídnaðurin í Kina framleitt nógv meir, enn teirra egnu rávørur kunnu fóðra. Tí keypir Kina alt Afrika upp og bindur tað niður í skuld. Kina ger árliga miljarda íløgur í ráevni, námsvinnu og infrakervi, ja “eigur” longu Afrika.

Kinesarar reka allar tekniskt krevjandi uppgávur, og 10.000-tals kinesarar flyta hvørt ár til Afrika at arbeiða. Tey skitnastu og hættisligastu arbeiðini í opnum og grivnum námum sleppa afrikanarar, ofta børn, at gera uttan verju.

Kinesiskir formenn hundsa við innføddum arbeiðsfólki sum aldri síðan trælatíðina, og einki sosialt ella mentanarligt samband er millum partarnar.

Afrikansk lond hava eisini lænt risa upphæddir í Kina til at dekka sín fíggjar- og kapitaltørv. Afrikanskir leiðarar eru lættir at mutra, og fleiri lond, t.m. eisini hitt fyrr so ríka Suðurafrika, eru komin á ørmundarhúsi.

Kinesarar hava yvirtikið fleiri fallerað afrikansk ráevnisnám og nógv infrakervi, jarnbreytir, havnir, veganet og landbúnaðarøki, sum í Pakistan og Shri Lanka.