Bóndafelagið og Óðalsfelagið taka nú málið upp um rættin at ferðast frítt í føroysku náttúruni. Á felags limafundi á Búnaðarstovuni í Kollafirði, leygardagin, fara feløgini at spyrja sínar limir, hvat teir halda um spurningin.

Evni á fundinum er: Ferðavinna við atliti til vernd av náttúru og gongd í haga.

“Nógv kjak, bæði millum fólk og í politisku skipanini, hevur verið seinastu tíðina, um rættin at ferðast frítt í høgunum. Hetta kemst av tí nógv øktu ferðsluni í náttúruni, serliga frá ferðavinnuni,” siga feløgini í tíðindaskrivi.

• Hvat gera vit við hendan trupuleikan / møguleikan?
• Festarar og óðalsfólk varða av føroysku jørðini við rættindum og skyldum - hvussu fáa vit sum frægast burturúr?
• Kunnu vit skipa okkum við felags leisti?

spyrja feløgini.

Fundurin á Búnaðarstovuni í Kollafirði verður leygardagin klokkan 14.