Vit menniskju harmast, at rættvísi ofta tykist vera trotavøra. Full rættvísi fyri øll og í øllum lutum hevur neyvan verið og verður neyvan nakrantíð á fold.

Frægast man vera, at øll standa líka fyri lógini, og vit áttu at verið nøgd, at ikki øll hava sama rætt til somu úrslit uttan mun til evnir, útbúgving og ágrýtni.

Í fjør kókaði yvir hjá ungum asiatum í USA og foreldrum teirra, ið mótmæltu tí órættvísi, ið hevur valdað, tá um atgongd teirra til hægri útbúgving ræður.

Í USA brúka flestir almennir stovnar “affirmative action”, t.e. øvugta diskrimin-ering í m.a. starvssetan, rætti til almannahjálp, upptøku til útbúgving o.t.

“Affirmative action” í USA er sett í verk í bestu meining. Mest hava tó tey vinstrahallu, Democrats, virkað fyri hesum positiva mismuni.

Hesin almenni og lógarfesti mannamunur millum eitt nú fólkasløg, minnilutar, kyn, húðalit, átrúnað o.a. førleika er ætlaður til at stuðla teim “minni mentu”, so tey ikki detta niður ímillum, verða eftirbátar móti teim, ið sjálvi klára seg.

Men geva landsins myndugleikar teim “veiku” forrætt, svíður at hjá fjøldini.

Í 2018 gingu nógvir asiatar kravgongu, tí hægri lærustovnar krevja nógv hægri próvtøl av asiatum enn øðrum, t.d. innføddum, svørtum og tilflytarum.

Vinstrahalli Bill de Blasio borgarstjóri hevur nú ásett rasukvotur á hægru skúl-arnar í New York til at stuðla minnilutum. Hóast 73% av asiatum í Styvesant kvalifisera til upptøku móti 3% av spansktmæltum og bert 0,7% av svørtum, sleppa bert 20% av asiatum inn. Svørt, brún og hvít tils. fáa 80% av kvotuni.

Sum vera man kenna asiatar seg diskriminineraðar. Sama geldur tey bestu (Ivy League) universitetini, ið liggja fram við sjónum báðumegin í USA. Har er kvotan fyri asiatiskir amerikanar bert 20%, hóast teir kvalifisera til tað dupulta.

Á vanligum universitetum telja asiatar upp í 50% av teim lesandi, hóast tey bert eru 3% av amerikanska fólkinum. Í California telja asiatar bert 5% av øllum íbúgvum, men eru heili 45% av øllum teim hægri lesandi.

Tey hvítu eru tann fólkabólkur, ið lutvalsliga verður hildin mest niðri, so fleiri minnilutar enn uppiborið við próvtølum sleppa inn á hægri lærustovnar í USA.