Flest fólk høvdu uppgivið, at neyðin í Etiopia við 100 mió íbúgvum helmaði í, og at borgarakríggið millum Etiopia og Eritrea við bert 5 mió fólkum fór at enda. Men í 2018 varð ein etiopari, Ahmed Abiy, valdur forsætisráðharri, og hann hevur givið mongum í Eysturafrika og aðrastaðni eina vón.

So ymiskir miðlar sum Ethiopian Herald, Suddeutsche Zeitung, WaPa og Al Jazera hava fegnast um kúvendina, ið tykist vera íkomin í báðum londum.

Etiopar hava leingi verið hart royndir. Fyrst 3-heims ravnabøli, so kommun-isturin Haile Mariam, klútadukka hjá Sovjet, so at miljónir doyðu í hungri. Í 1991 kom nýggj demokratisk grundlóg, men harðræðið helt bara fram.

Ahmed Abiy, forsætisráðharri, vísti longu nývaldur góðan vilja og læt 1000-tals politiskar fangar leysar, t.m. tíðindafólk, ið hava funnist at stjórnini. Hann hevur bannað píning av fangum og drigið ólátaðar fangavørðar fyri rættin. Abiy hevur eisini boðið hópi av útlagnum andstøðingum heimaftur.

Mest óvæntað er, at nýggi maðurin hevur bundið frið við grannalandið Eritrea fyri eystan út ímóti Reyðahavi. Kríggið millum Eritrea og Etiopia hevur varað frá 1998, 5 ár eftir at Eritrea tók sjálvstýri frá Etiopia. Bardagin hevur snúð seg um markið, og 70.000 hermenn eru deyðir um ein bý við fólkatali sum Toftir.

Abiy hevur verið so politiskt klókur, at hann hevur latið Eritrea fáa lítla býin. Markið er latið uppaftur, telesamskifti opnað, og skyldfólk vitja hvør onnur frítt.

Við 100 mió íbúgvum hevur Etiopia havt fjølmentastu hermegi í Afrika sunnan fyri Sahara. Washington Post vónar, hetta er byrjanin til, at Etiopia og Eritrea kunnu gerast ein “klettur av støðufesti” í ruðuleikanum á afrikanska Horninum, higartil eyðkent av miseydnaðum londum sum Somalia og Suðursudan.

Ófriður við vápnaðum kravgongum ímóti stjórnini og hóttandi hungursneyð førdu til neyðrættarstøðu og útloysti valið, ið førdi til persónsskifti í stjórnini.

Hvussu leingi fer hesin friður og framburður at vara, spyr Al Jazera av øllum miðlum? Einki yvir at dylja er Afrika tiltikið fyri politiskan harðskap. Mangan hava nýggir leiðarar kveikt vón og verðið róstir til skýggja sum nýskapandi, og so enda allir á sama hátt: Sum tjóvskir, bloðdálkaðir einaræðisharrar.

Higartil hevur Abiy roynst væl. Men fólk spyrja longu: Hvussu leingi? Vit vóna.