Sjómanskvinnuringurin í KFUM&K í Klaksvík 60 ár í dag
Tað var 13 januar í 1959, at átta kvinnur komu saman í heiminum hjá táverandi trúboðara hjá Heimamissiónini, John Munch, fyri at byrja ein sjómanskvinnuring. Suffía (Fía) Lassen, var vald til forkvinnu.
Endamálið við ringinum var at savna kvinnur, sum kundu stuðla arbeiðinum hjá Føroysku Sjómansmissiónini bæði andaliga og handaliga. Andaliga við forbøn og handaliga við at savna pening til arbeiðið og at gera jólapakkar til sjófólkið. Tað skrivar Føroyska Sjómansmissiónin á sínum facebook vanga.
Ringurin hevur ment seg gjøgnum árini, og umleið 30 kvinnur eru í ringinum í dag. Uppgávurnar eru stórt sæð tær somu, hóast umstøðurnar eru nógv broyttar og innihaldið á kvøldunum er væl meiri fjølbreitt nú enn fyrr. Viðhvørt bjóðar ringurin øðrum ringum at vitjað og so vitjað tær viðhvørt aðrar ringar. Harafturat vitjað Sjómanstrúboðarin og onnur ringin av og á. Kvinnur úr ringinum hava eisini verið trúfastar á Landsstevnuni, sum síðstu mongu árini hevur verið í Leguhúsinum í Nesvík fyrst í mai.
Ringurin samlast trúfast fyrsta mánakvøld í hvørjum mánað frá september til mai, har allar kvinnur eru hjartaliga vælkomnar. Forkvinnur hesi 60 árini hava verið:
Fía Lassen, Karolina Jacobsen, Jóhanna Christiansen, Ása Heinesen og Johild Johannesen.
Í samband við føðingardagin í dag verður hátíðarhald í KFUM&K í kvøld kl. 18 har øll eru hjartaliga vælkomin. Á skránni verður felags -og solosangur, søgulig frágreiðing í orðum og myndum, andakt og heilsanir.
Mest lisið í farnu viku
Samband
Heygsvegur 8
490 Strendur