Um vikuskiftið avdúkaði Javnaðarflokkurin teirra nýggjasta valevni til komandi løgtingsval. Hetta kann vera ein ábending um at valið nærkast:

Vit eru errin av at avdúka, at gløgga, unga kvinnan Ingilín D. Strøm ætlar sær á valevnislistan hjá Javnaðarflokkinum komandi løgtingsval.

Ingilín er 27 ára gomul og er úr einum blóðreyðum javnaðarheimi, har politiski áhugin og ábyrgdarkenslan fyri umheiminum hevur verið ein stórur partur av uppvøkstrinum og lívinum sum heild. Á altjóða studentaskúlanum United World College búði og las Ingilín saman við menniskjum úr øllum heiminum, og varð hetta ein grundleggjandi áminning um, at rættvísi og virðing ikki er nakað, ið kemur av sær sjálvum, og heldur ikki nakað, ið vit kunnu taka fyri givið. Eftir at hava búð og arbeitt í Addis Ababa, Keypmannahavn og øllum har ímillum, flutti hon við manninum Teitur Lassen og soninum Una Halgir heim til Føroya og tók prógv í føroyskum á Fróðskaparsetrinum. Tað skrivar Javnaðarflokkurin á heimasíðu síni. 

- Eg stilli upp, tí eg vil arbeiða fyri einum samfelag, ið flógvar um solidaritet og arbeiðir í felag um felags, rættvísar, burðardyggar og innihaldsríkar loysnir fyri náttúru og fyri menniskju, sigur Ingilín D. Strøm.

Løgtingsval skal í seinasta lagi verða tann 1. september.