Skipasmiðjan Mest hevur reist íbúðir á Skála, har 48 arbeiðsmenn á skipasmiðjuni skulu búgva. Talan er um tvær langar lonir við tilsamans 48 einmanskømurum umframt ein tvørgangandi bygning.

Bygningarnir eru settir saman í byggihøllini, og síðani eru teir fluttir suður á økið sunnanfyri Turkihúsið, har teir skulu standa.

“Talan er ikki um eina fyribils loysn, men bygningarnir skulu verða standandi á økinum,” segði Mouritz Mohr, stjóri, tá vit tosaðu við hann í heyst.

“Vit skulu brúka nógv fólk í sambandi við havrannsóknarskipið, men eisini onnur arbeiði krevja nógv fólk,” segði Mouritz Mohr.

Havrannsóknarskipið kemur eftir ætlan á Skála í summar.