Landsverk: Ongar ógoldnar rokningar liggja og flóta hjá okkum
Ein gomul rokning er ikki goldin, men tað er tí at ósemja er um støddina á rokningini.
Leiðslan á Landsverki vil ikki hava sitandi á sær, at rokningar í sambandi við verkætlanina Glasir liggja og flóta runt á stovninum. Í eini almennari viðmerking í gjár ger Landsverk greitt, at tá sagt hevur verið í miðlunum, at rokningar liggja aftur til 2015, so er talan um eina rokning, sum ikki er goldin, og tað er orsaka av, at ósemja er um støddina á rokningini, ið er partur av gerðarrættarmálinum millum Landsverk og TG Verk.
“Allar rokningar hjá tí almenna koma inn ígjøgnum roknskaparskipanina hjá landinum og verða síðani fluttar til Landsverk. Rokningarnar eru sostatt skrásettar í almennu gjaldsskipanini, sum er ein trygg skipan, ið allir almennir stovnar undir landinum nýta,” sigur Landsverk.
“Tá rokningarnar eru góðkendar, verða tær goldnar beinanvegin. Liggja tær ov leingi í skipanini, verða áminningar sendar rætta viðkomandi um at vátta rokningarnar,” sigur stovnurin.
Í fráboðanini frá Landsverki stendur, at tað at rokningar liggja og flóta runt á Landsverki, og at deildarleiðarar og leiðsla ikki vátta rokningar, er tikið úr bláari luft og hevur einki samband við veruleikan.
“Rokningarnar liggja júst har, tær skulu. Sostatt liggja ongar rokningar, sum við vilja ella orsakað av óskili ikki eru goldnar,” stendur í skrivinum.
Landsverk viðgongur tó, at óvissa er framvegis um nøkur viðurskifti, men hon snýr seg um, hvørt tað koma fleiri rokningar, ið Landsverk sum byggiharri ikki hevur roknað við, og sum núverandi leiðsla ikki er vitandi um.
Eingin í verandi leiðslubólki á Landsverki hevur verið beinleiðis partur av verkætlanini á Glasi.
Mest lisið í farnu viku
Havstovan tilmælur at stongja tað mesta
Samband
Heygsvegur 8
490 Strendur