Fleiri føroysk matvøruvirki eru góðkend til at útflyta til Kina
Tilsamans eru 40 føroysk fiskavirki, frostgoymslur, verksmiðju- og frystiskip á listanum.
Kinesiski myndugleikin GACC hevur nú dagført listan yvir føroysk virki, sum kunnu útflyta til Kina. Tilsamans eru 40 føroysk fiskavirki, frostgoymslur, verksmiðju- og frystiskip á listanum. Tað sigur Heilsufrøðiliga Starvsstovan.
“Samsvar hevur ikki verið millum faktisku umstøðurnar og hvat hevur staðið á listanum seinastu tíðina, orsakað av innanhýsis umskipan hjá kinesisku myndugleikunum. Hetta er nú komið í rættlag,” sigur Starvsstovan.
Heilsufrøðiliga Starvsstovan undirskrivar hvørja viku einar 60-70 heilsuváttanir fyri góðkend virki, sum útflyta til Kina. Talan er serliga um feskan laks, men seinastu tíðina er eisini frystur makrelur útfluttur til Kina.
Virki mugu vera á listanum
Virki, sum ætla sær at útflyta til Kina mugu vera á Kina-listanum.
Tað tekur tíð at fáa listan dagførdan, og tí er neyðugt at virki og skip senda umsókn inn til Heilsufrøðiligu Starvsstovuna sum skjótast. Virki kunnu ikki útflyta til Kina fyrrenn listin er góðkendur av GACC, almannakunngjørdur á teirra heimasíðu og á heimasíðuni hjá Heilsufrøðiligu Starvsstovu.
Nýggjur dagførdur listi verður sendur til Kina í mars.
Mest lisið í farnu viku
Samband
Heygsvegur 8
490 Strendur