Í fráboðan í dag gjørdi Landsbankin upp, at føroysku húskini eiga 2 mia.kr. meira enn tey skylda. Og staðfesti bankin, at hetta er munandi hægri enn í 2013, tá sama upphædd var 900 mió.kr. Fíggjarstøðan mótvegis føroysku bankunum er sostatt batna við 1,1 mia.kr.

Gaman í, skylda føroysku húskini í november 2018 2,5 mia. kr, sum VP.fo vísir á. Tað átti Landsbankin sjálvandi at havt við í uppgerðini fyri at siga nakað um fíggjarliga støðufestið. Realkredittskuldin er tó 200 mió.kr minni enn í 2013, tí er fíggjarstøðan batna enn meira.

Men fyri at geva ein rættvísandi heildarmynd manglar uppgerð Landsbankans ikki bert postar á passivsíðuni hjá føroysku húskjunum, tí á aktivsíðuni mangla bæði virðið á býlunum og pensjónsuppsparingini. Pensjónin var 9,5 mia.kr við ársenda 2017, og man hon nú táttað í 10 mia.kr.

Uppsparingin er økt við áleið 1,5 mia.kr. síðani 2013. Virðið á býlisognunum er eisini økt munandi í nevnda tíðarskeiðnum, tá húsaprísirnir eru øktir heilt fitt umframt nógv nýbygging hevur lagt aftrat ognunum. Leysliga mett eru hesar ognir øktar áleið 3 mia.kr. hesi árini.
Sostatt er samlaða fíggjarstøðan hjá føroysku húskjunum batnað við sløkum 6 mia.kr. síðani 2013:
+ 1,1 mia.kr. Øking í nettoinnlánum
+ 0,2 mia.kr. Minking í realkredittskuld
+ 1,5 mia.kr. Øking í pensjónum
+ 3,0 mia.kr. Øking í býlisvirðum

Uppgerð Landsbankans er ikki faktuel skeiv, men hon vísir einans viðskiftini millum føroysku húskini og bankarnar.

Hetta skrivar Johnny á facebook í kvøld.