Lógaruppskot um bústaðapakka latið løgtinginum
Bústaðir skal byggja 200 leiguíbúðir afturat teimum 400 sum eru í gongd, og eisini skulu kommunurnar fáa betri møguleikar at seta á stovn eldrabústaðir, og leigulógin verður harumframt tillagað.
Landsstýriskvinnurnar Kristina Háfoss og Eyðgunn Samuelsen hava latið Løgtinginum lógaruppskotini í bústaðapakkanum hjá landsstýrinum.
“Landsstýrið ásannar, at stórar avbjóðingar eru á føroyska bústaðamarknaðinum, og tí hevur verið arbeitt við einum bústaðapakka við ymiskum átøkum, sum ætlandi fara at bøta um støðuna á bústaðamarknaðinum og minka um trotið á bústøðum, ið serliga stóri fólkavøksturin seinastu árini hevur havt við sær,” sigur landsstýrið í einum tíðindaskrivi.
“Tað hevur stóran týdning, at vit fáa fleiri at leiga út mongu tøku fermetrarnar kring landið til langtíðarleigu. Eisini er neyðugt at økja útboðið við at Bústaðir byggja 200 leiguíbúðir afturat teimum 400, sum eru í gongd. Bústaðarátøkini fara samanlagt at økja talið av leigubústøðum í Føroyum munandi” sigur Kristina Háfoss, landsstýriskvinna við fíggjarmálum. Hon sigur, at mett verður, at tørvur er á 600 bústøðum afturat teimum, sum longu eru í gerð ella eru um at vera lidnir.
“Tað almenna átekur sær við teimum 200 framskundaðu bústøðunum ein triðing av samlaða tørvinum,” sigur hon.
Eisini onnur átøk
Bústaðapakkin hjá landsstýrinum fevnir eisini um onnur, meira langskygd átøk. Millum annað fáa kommunurnar betri møguleikar at seta á stovn eldrabústaðir, og leigulógin verður eisini tillagað.
“Endamálið við tí er at tryggja ein betur skipaðan leigumarknað, og at útboðið av leigubústøðum kring landið skjótast gjørligt verður økt,” sigur landsstýrið.
Mest lisið í farnu viku
Samband
Heygsvegur 8
490 Strendur