Ætlan um universitetskampus á Frælsinum er handað Mentamálaráðnum
Strategiska kampusætlanin, sum nú er handað Mentamálaráðnum, er fyrsta stigið í tilgongdini at fáa eitt atdráttarmikið og tíðarhóskandi undirvísingar- og granskingarumhvørvi, sum skal vera miðdepil fyri lesandi, undirvísarar og granskarar, umframt at umhvørvið ella kampusøkið skal vera áhugavert fyri býin og atkomuligt fyri borgararnar. Tað skrivar Mentamálaráðið á heimasíðu síni.
Arbeiðsbólkurin hevur í høvuðsheitum verið samskipandi og hevur sett fakligan ráðgeva at standa fyri arbeiðinum at gera strategiska kampusætlan. Arkitektafyritøkan Henning Larsen Arkitekter vann útboð um arbeiðið og hevur staðið fyri kampusætlanini, sum ásetir, hvussu karmarnir fyri framtíðar universitets- og granskingarvirksemi kunnu skipast á kampusøkinum. Menningarætlanin leggur upp fyri verandi og framtíðar tørvi og er grundað á virði, sum eru ásett í frágreiðing frá juni 2016, sum fyrrverandi arbeiðsbólkur gjørdi um framtíðar hølisviðurskiftini hjá Fróðskaparsetrinum, skrivar Mentamálaráðið.
Tilmæli frá arbeiðsbólkinum er soljóðandi:
Fyri at røkka málinum at menna eitt altjóða kappingarført universitet er neyðugt at savna Fróðskaparsetrið og skapa umstøður fyri, at aðrir granskingarstovnar kunnu staðsetast á sama øki.
Framtíðar universitets- og granskingarøkið skal liggja á tí samanhangandi økinum, sum røkkur frá Frælsinum um Nóatún og Debesartrøð oman til J.C. Svabos gøtu.
Arbeiðsbólkurin mælir til, at næsta stigið í tilgongdini at útvega eitt universitetskampus verður at detailprogrammera og gera byggiskrá. Eftir hetta verður arkitektakapping boðin út, væntandi fyrst í 2020. Tilmælið kann síggjast í leinkjuni her.
Limir í arbeiðsbólkinum eru:
Sigurð í Jákupsstovu, rektari, Fróðskaparsetur Føroya, formaður í arbeiðsbólkinum
Sanna A. Dahl, vísindaligt hjálparfólk, Fróðskaparsetur Føroya
Jóan Petur Hentze, trivnaðarstjóri, Tórshavnar kommuna
Marjun Weihe Thomassen, fíggjarleiðari, Bústaðir
Ole Jensen, arkitektur, Landsverk
Barbara Gårdlykke Apol, Meginfelag Føroyskra Studenta
Martin Næs, deildarstjóri, Mentamálaráðið
Alda Joensen, fulltrúi, Mentamálaráðið
Mest lisið í farnu viku
Samband
Heygsvegur 8
490 Strendur