Gransking av føroyskum streptokokkum í Nature Genetics
Føroyskir granskarar hava í samstarvi við leiðandi altjóða genomgranskarar almannakunngjørt slóðbrótandi genetiska bakteriugransking um bakteriuna Streptococcus pyogenes í tíðarritinum Nature Genetics, sum er leiðandi genetiska tíðarritið í heiminum.
Tað eru Shahin Gaïni, ph.d., yvirlækni á Landssjúkrahúsinum, og Marita Debess Magnussen, ph.d., medisinskur mikrobiologur á kanningarstovuni Thetis, sum eru viðhøvundar í greinini, har granskararnir hava gjørt umfatandi heilgenomkanningar av 2101 bakteriuisolatum av slagnum Streptococcus pyogenes (hemolytiskir gruppe A streptokokkar). Granskingin er eitt framhald av ph.d.-verkætlanini hjá Maritu Debess Magnussen um antibiotikamótstøðuføri í Føroyum. Tað skrivar Granskingarráðið á heimasíðu síni.
Shahin Gaïni og Marita Debess Magnussen hava verið við í einum altjóða toymi við luttakarum úr USA, Finnland, Noregi og Ísland.
Shahin Gaïni, ph.d., yvirlækni, ger hesar niðurstøður:
“Streptococcus pyogenes er tann vanliga hálsbrunabakterian, sum kommunulæknar kunnu kanna fyri, áðrenn teir møguliga geva penicillin fyri hálsbruna. Bakterian kann geva alt frá vanligum hálsbruna til tær mest álvarsligu og lívshóttandi infektiónirnar sum t.d. ‘kjøtetandi bakteriinfektiónir/Necrotizing fasciitis’, har einasta viðgerð er akutt amputatión og umfatandi mutilerandi skurðviðgerð. Aðrar sjúkur, sum bakterian er atvold til, er toksisk sjokksyndrom og aðrar lívshóttandi blóðeitransinfektiónir. Bakterian er eisini tann klassiska atvoldin til barsilsfepur og kann eisini geva lívshóttandi meningitis og blóðeitran hjá nýføðingum. Tíbetur eru barsilsfepur og neonatalinfektiónir við Streptococcus pyogenes sera óvanligar í framkomnum londum í dag.
Greinin í Nature Genetics eitur “Integrated analysis of population genomics, transcriptomics and virulence provides novel insights into serotype M28 Streptococcus pyogenes pathogenesis” og samandráttur sæst her.
Mest lisið í farnu viku
Havstovan tilmælur at stongja tað mesta
Samband
Heygsvegur 8
490 Strendur