Barnafestivalur í Norðurlandahúsinum
Fjølbroytt skrá fyri børn í 10 dagar.
30. mars- 7. apríl verður barnafestivalur í Norðurlandahúsinum. Barnafestivalur er 10 dagar á hvørjum ári, og umleið 6.000 børn vitja hvørt ár festivalin, har tey uppliva føroyska, norðurlendska og altjóða list og mentan.
Skráin í ár er sum altíð sera fjølbroytt. Føroya Symfoniorkestur spælir tónleikaævintýrið Veiða Vind, heimskendu Cirkus Cirkør vitja við sýningini Bagage, Marionetteatern úr Svøríki spæla pinkubarnasjónleikin Da-da-da, og eisini verður dansað.
“Størsta stjørnan, sum vitjar festivalin í ár, er uttan iva ungi danski youtubarin Rasmus Brohave, sum fer at siga frá sínum lívi og leiðini frá at vera ein erkvisin drongur úr Svendborg til at vera eitt ”internetfenomen”,” sigur Norðurlandahúsið í einum tíðindaskrivi.
Ein onnur ung stjørna sum vitjar barnafestivalin er 15 ára gamli rapparin MachoMayne úr Noregi.
Listin hjá børnunum sjálvum sleppur eisini framat á festivalinum. Framsýningin ”List sum kann etast” er við listaverkum, sum pinkubørn hava málað. Ungar stjørnur spæla konsert og ungir dansarar luttaka til setanina. Eisini verður eitt barnabókasavn við bókum, sum børn hava skrivað og gjørt. Øll børn í Føroyum eru boðin at skriva bøkur til bókasavnið.
Fleiri verkstovur eru á skránni, m.a. ein listaverkstova til pinkubørn og ein ritiverkstova, har børn kunnu læra at gera telduforrit.
Øll skráin sæst á heimasíðuni hjá Norðurlndahúsinum.
Mest lisið í farnu viku
Havstovan tilmælur at stongja tað mesta
Samband
Heygsvegur 8
490 Strendur