Reiðarafelagið fyri Handilsskip, Føroya Skipara- og Navigatørfelag, Maskinmeistarafelagið og Føroya Fiskimannafelag skrivaðu fríggjadagin undir semju um nýggjar tvey-ára sáttmálar. Tað skrivar Vinnuhúsið í dag. Talan eru um tilsamans 9 sáttmálar.

Við hvørt felag er ein yvirskipaður sáttmáli og tveir sersáttmálar fyri frálandaskip.

Eftirlønin hækkar 1. mars 2019 til 11,25 % og aftur 1. mars 2020, tá hon verður 12,5 %. Tilsamans hækka løn og eftirløn við ávikavist 3,26 % fyrra árið og 2,56 % seinna árið. Hetta er sama hækking, sum hini feløgini á privata arbeiðsmarknaðinum hava fingið í hesi samráðingarrunduni.

“Nú er sostatt semja um allar sáttmálarnar, sum Reiðarafelagið fyri Handilsskip hevur við manningarfeløgini, og felagið fegnast um, at samráðingarnar ikki hildu á langt útyvir, at gomlu sáttmálarnir fóru úr gildi,” sigur Vinnuhúsið.

Allir sáttmálarnir ganga til 1. mars 2021.