“Er møguleiki at taka pensjónsskipanina burturúr hesum uppskotinum og lata alt hitt liggja?” Tað spurdi Jenis av Rana, løgtingsmaður, á tingfundinum í gjár, tá hann var framsøgumaður fyri Miðflokkin í málinum um lønina hjá tingfólkum.

“Eg dugi ikki at síggja grundgevingina fyri, hví vit eisini skulu hava lønarhækkan. Pensjónina er breið semja um,” segði hann.

Hann helt, at uppskotið hjá løgtingsformanninum fer at økja enn meira um ójavnan, sum er í samfelagnum, og hann helt seg eisini duga at síggja, at nevndin sum hevði tilevnað uppskotið hevði sitið og roynt at funnið eina grundgeving fyri, hví løgtingsfólk skulu fara upp í løn.

“Um vit hyggja eftir lønarsamráðingunum sum hava verið ta seinastu tíðina, so hevur talan fyri tað mesta verið um 2 - 3 % í lønarhækkan, hóast einstøk fakfeløg hava fingið munandi meira. Vit kundu eisini lagað løgtingsmannalønina eftir tí,” segði hann.

Hann undraðist eisini á, at skotið varð upp, at løgtingsfólk skuldu fáa 15% í eftirløn, tí samgongan hevur lækka uppsparingina hjá fólki annars niður á 12%.

“Vit hava tikið undir við, at uppskotið verður lagt fram, men vit eru annars ivandi um uppskotið,” segði Jenis av Rana.