“Eg ætli mær ikki at atkvøða fyri uppskotinum, hóast eg taki undir við at eftirlønin verður broytt.” Tað segði Sonja Jógvansdóttir, uttanflokkatingkvinna, tá uppskotið um at broyta lønina hjá løgtingsfólkum var til fyrstu viðgerð í løgtinginum í gjár.

“Onnur hava verið í verkfalli í fleiri vikur, og hava fingið nógv minni lønarhækkan enn hetta,” segði hon.

Sonja Jógvansdóttir vísti á, at tað eru tveir bólkar í samfelagnum, sum ikki hava eina eftirlønarskipan. Annar bólkurin eru tænastumenn, sum hava eina aðra skipan, og hini eru fyritíðarpensjónistar.

Hon fanst eisini at sokallaða kostnaðarendurgjaldinum, sum tingfólk fáa, fyri at ferðast til og frá Løgtinginum. Hon helt at tingfólk áttu, eins og aðrir borgarar, at søkt um at fingið ferðaútreiðslur endurgoldnar.