Úrslitið hjá Betri Banka áðrenn skatt í 2018 gjørdist 117,0 mió. krónur, og eftir skatt var tað 96,5 mió.krónur. Úrslitið er í stóran mun ávirkað av góðu tíðunum í Føroyum, sigur bankin í einum tíðindaskrivi.

“Vit fegnast um, at útlánini øktust góð 10% í fjør. Vøksturin hevur verið bæði á privatlánum og vinnulánum. Á øllum deildum kring landið hava vit upplivað øktan eftirspurning eftir fíggingum,” sigur Jean Djurhuus, forstjóri.

Krøvini herðast

Sum SIFI-peningastovnur er væntandi, at Betri Banki fer at fáa munandi herd myndugleikakrøv til kapital og solvens, og hesi krøvini fara at hava avbjóðingar við sær, bæði tá talan er um lønsemi og krøv til kapital. Bankin sigur, at øktu kapitalkrøvini gera tað dýrari at reka bankan.

“Vit fara tó at arbeiða fyri, at hesi krøv í minst møguligan mun fara at ávirka okkara kundar,” sigur Jean Djurhuus.

Eiga nú í Suðuroyar Sparikassa

Betri Banki hevur í árinum keypt 24,7 % av partapeninginum í Suðuroyar Sparikassa.

“Betri Banki virkar einans í Føroyum, og tí var tað upplagt at taka av, tá vit fingu hendan møguleikan,” sigur Jean Djurhuus.

Bankin væntar at úrslitið áðrenn skatt í 2019 verður millum 40 og 70 mió.kr.

Árið í stuttum:

• Ársúrslitið: 96,5 mió. kr.

• Úrslitið áðrenn skatt: 117,0 mió. kr.

• Afturførdar niðurskrivingar av útlánum og aðrari ogn: 54,0 mió. kr.

• Úrslitið áðrenn skatt, javnan av kapitalpørtum og niðurskrivingum: 60,7 mió. kr.

• Fíggjarstøðan javnvigar við 9.542 mió. kr.

• Útlán: 6.163 mió. kr.

• Innlán: 7.650 mió. kr.

• Yvirdekningur í mun til lógarkravda gjaldførið er 214,1 %

• Solvensurin við árslok er 26,5%